Viðskipti | AP | 9.10.2008 | 22:29

Hollensk stjórnvöld tryggja hag Icesave reikningshafa

Wouter Bos, fjármálaráðherra Hollands Reuters

Hollenska ríkisstjórnin hefur ákveðið að verja allt að 20 milljörðum evra í stuðning við hollenskar fjármálastofnanir vegna fjármálakreppunnar. Segir fjármálaráðherra Hollands að stjórnvöld séu reiðubúin til þess að tryggja það að hollenskir sparifjáreigendur fái meirihlutann af innistæðu sinni inn á Icesave reikningum Landsbankans í Hollandi. Talið er að innistæður Hollendinga á Icesave reikningum séu um 1,6 milljarðar evra.

Fjármálaráðherra Hollands, Wouter Bos, segir að þeir sem eigi fjármuni á Icesave muni á einn eða annan hátt fá sparifé sitt til baka upp að 100 þúsund evrum. Þetta kom fram í máli ráðherrans á blaðamannafundi í kvöld.

Segir í frétt AP fréttastofunnar að talið sé að meirihluti þess fjár sem Hollendingar eiga inni á Icesave reikningum falli undir ábyrgð íslenskra stjórnvalda en mikill efi sé um að þau ráði við að greiða það til baka.