Robert Peston, viðskiptaritstjóri BBC. mbl.is

Efnahagsbrotadeildin breska íhugar nú að hefja rannsókn á röð frétta viðskiptaritstjóra BBC, Robert Peston, sem hafa valdið umtalsverðum usla á fjármálamarkaðinum og margir telja eiga upptök sinn innan úr innsta kjarna breska stjórnkerfisins. Í The Observer um helgina kemur að leitogi Íhaldsflokksins, David Cameron, hafi gert að því skóna að Peston hafi aðgang „moldvörpu" eða óþekktum heimildarmanni í Downingstræti eða fjármálaráðuneytinu.

Efnahagsbrotadeildin hefur staðfesti við blaðið að forstöðumaður hennar, Richard Alderman, hafi fengið erindi frá þingmanni íhaldsmanna, Greg Hands, og hann sent með stuðningi Georg Osborne, sem fer með efnahags- og fjármál í skuggaráðuneyti Cameron. Þar er óskað eftir því að rannsakaðar verði „ásakanir um sviksamlegt athæfi“ í innsta kjarna ríkisstjórnarinnar. Er haft eftir talsmanni efnahagsbrotadeildar að erindið sé nú til skoðunar.

Í bréfinu frá Hands, sem er fyrrum miðlari hjá Credit Suisse og BNP Paribas, er því hvergi haldið fram að Peston hafi aðhafst eitthvað ólögmætt. Peston hefur skotist upp á stjörnuhiminn breskrar fjölmiðlunar með því að vera fyrstu með röð frétta um lánsfjárkreppuna og björgunaráætlun ríkisstjórnarinnar fyrir breska banka, eins og kom fram í grein í sunnudagsblaði Morgunblaðsins um Robert Peston.

Hands vitnar í bréfi sínu til þess að 17. september sl. hafi Peston fyrstu skýrt frá því í frétt að HBOS og Lloyds TSB bankarnir ættu í leynilegum yfirtökuviðræðum. Ríkisstjórnin útbjó leynilega björgunaraðgerð í viðræðum milli bankanna, fjármálaráðuneytis og fjármálaeftirlits. Gordon Brown, forsætisráðherra, tók síðan Victor Blank, stjórnarformann Lloyds, afsíðis í hanastélsboði til að fullvissa hann um að stjórnvöld myndu sjá til þess að samkeppnisyfirvöld myndu heimila yfirtökuna, segir The Observer.

Hlutabréf í HBOS höfðu átt undir högg að sækja vegna þess að breski húsnæðismarkaðurinn veiktist hratt á þessum tíma og þrýstingur á gengi þeirra jókst til muna þegar Lehman Brothers- fjárfestingabankanum í Bandaríkjunum var látinn fara í gjaldþrot. Hands heldur því fram að gengi hlutabréfa HBOS hafi hækkað til muna rétt áður en Peston sendi út fréttina um yfirtökuviðræðurnar við Lloyds.

„Mínútum áður en þessi frétt var send út,“ segir í bréfi Hands, „virðist nú sem keypt hafi verið rúmlega 20 milljón hlutir í HBOS á genginu 96 pens hvert, sem leiddi af sér umtalsverðan hagnað þar sem gengið steig í 215 pens klukkustundirnar á eftir að upplýsingarnar birtust.“ Vitnað er í bréfinu í Keith Skeoch, forstjóra Stndard Life Investment, sem hafi sagt: „Einhver réði yfir upplýsingum. Þeim upplýsingum var lekið og það olli hreyfingu á gengi HBOS bréfanna.“