Birna Einarsdóttir.

Birna Einarsdóttir, bankastjóri Glitnis, segir í viðtali við Financial Times í dag að líklegt sé að Glitni muni að öllum líkindum horfa aftur í tímann nú eða til ársins 2005. „Þetta var góður banki – hann var það áður en við fórum í allar þessar yfirtökur og stækkun erlendis.”

Blaðamaður FT, Sarah O'Connor, hefur eftir Birnu í viðtalinu, að hún kunni einungis eitt – viðskipti. Menntun hennar snúi einvörðungu að viðskiptum og ráðleggur Birna ungu fólki að leita víðar þegar það aflar sér menntunar. Það sé seinni tíma mál að sérhæfa sig í einhverju.

Á meðan viðtalinu stendur hringir bleikur farsími Birnu og segist hún ekki vita hvernig eigi að breyta hringingunni sem er vinsælt popplag. Már Másson, sem sér um samskiptamál Glitnis, muni biðja hana um breyta um hringitón enda sé hún núna bankastjóri.

Segir í FT að Birnu bíði gríðarlegt verkefni, að byggja upp viðskiptabanka á sama tíma og efnahagslífið sé í frjálsu falli. Margir af íbúum Íslands hafi tapað sparifé sínu, lífeyri og geti ekki greitt af lánum. Orðspor landsins hafi beðið hnekki og einhverjir erlendir bankar neiti jafnvel að millifæra peninga viðskiptavina til landsins.

Hugmyndir um nýjar höfuðstöðvar orðnar að engu

„Ég er kannski barnaleg en ég held að við finnum leið út úr þessu,” segir Birna við blaðamann FT. Viðtalið er tekið á skrifstofu Birnu í höfuðstöðvum Glitnis við Kirkjusand og talið berst að fyrirætlunum bankans um að byggja nýjar höfuðstöðvar. Þær hugmyndir eru orðnar að engu líkt og margt annað hjá Glitni. „Okkur líður vel hér og það er nægt rými í byggingunni núna,” segir Birna og vísar til þess að um 100 starfsmönnum Glitnis hafi verið sagt upp.

Birna hóf störf hjá Íslandsbanka, forvera Glitnis, haustið 2004 sem framkvæmdastjóri sölu og markaðsmála.

Birna starfaði áður um sex ára skeið að markaðsmálum hjá Royal Bank of Scotland. Hún var markaðsstjóri Íslandsbanka á árunum frá 1994 - 1997 og um hríð einn af útibússtjórum bankans. Hún hefur jafnframt starfað sem markaðsstjóri Íslenska útvarpsfélagsins - Stöðvar 2 og Íslenskra getrauna.

Birna er viðskiptafræðingur frá Háskóla Íslands og MBA frá Háskólanum í Edinborg.

Birna segir að þegar hún ákvað að snúa aftur til Íslands árið 2004 hafi ýmsir undrast það að hún vildi koma heim á ný. Hún segir að ein aðalástæðan hafi verið að hún hafi séð sig hafa meiri áhrif á Íslandi heldur en hjá Royal Bank of Scotland. „Það var gott að setjast við borðið þar sem ákvarðanirnar voru teknar.” Hún viðurkennir hins vegar að það sé ekki auðvelt að fagna nýju starfi við þær aðstæður sem nú ríki. „Það er ekkert kampavínsboð í gangi, einungis mikil vinna við að láta hlutina gerast  á ný,” segir Birna.

Stjórnmálamenn hafa tjáð blaðamanni FT að valið á Birnu og Elínu Sigfúsdóttur í starf bankastjóra eigi að sýna fram á breytingar á stefnu bankanna.

„Ég held að ég sé í þessu starfi núna þar sem ég stýrði þeirri deild sem verður nú meginstoð  bankans. Það er þess vegna sem ég er hér núna, vona ég,” segir Birna. En hún segir að breyta verði um stefnu. „Bankinn óx of hratt og of mikið í of litlu hagkerfi með veikan gjaldmiðil.”

Höfum lært okkar lexíu

Birna segir að hinn nýi Glitnir muni væntanlega starfa erlendis síðar meir, bæði hvað varðar lánveitingar og fjárfestingar. Hins vegar muni verða erfitt að endurheimta traustið á ný. Það taki tíma og útrásin verður með öðrum hætti en hún var enda séu þau ekki heimsk. „Við höfum lært okkar lexíu,”  segir Birna og bætir við að Íslendingar hafi ávallt verið hugrakkir og lausir við ótta. Stundum sé það af hinu góða en ekki alltaf.