Tilkynning frá Valitor - Visa Ísland

Valitor, útgefandi Visa-korta á Íslandi, hefur sent frá sér tilkynningu vegna umfjöllunar um hæstaréttardóm sem féll fyrr í mánuðinum um aðgengi ríkisskattstjóra að yfirliti yfir hreyfingar á greiðslukortum sem gefin voru út erlendis en notuð á Íslandi frá 1.júlí 2006 - 30. júní 2007.

Yfirlýsingin er eftirfarandi:

„Í fjölmiðlum að undanförnu hefur verið fjallað um Hæstaréttardóm frá 3. október sl. í máli nr. 514/2008, ríkisskattstjóri gegn VALITOR hf. Af þessu tilefni vill VALITOR taka fram að það er meginregla hjá fyrirtækinu að berist beiðni um afhendingu gagna frá yfirvöldum, innlendum eða erlendum, eða öðrum og VALITOR telur einhvern vafa leika á um hvort félaginu sé heimilt eða skylt að afhenda gögnin þá er slíkum erindum synjað og dómstólum falið að skera úr.

VALITOR er háð skilyrðum laga í starfsemi sinni og vinnslu og meðhöndlar trúnaðarupplýsingar í samræmi við þau. Í því dómsmáli sem um ræðir var niðurstaða Hæstaréttar ekki einróma. Strax eftir uppkvaðningu dóms Hæstaréttar voru ríkisskattstjóra afhent umbeðin gögn.“

• Blogga um frétt