mbl.is

Stjórn Exista mun á hluthafafundi félagsins sem haldinn verður þann 30. október óska eftir heimild til þess að óska eftir afskráningu félagsins úr Kauphöll Íslands. Jafnframt að samþykkt verði heimild til að auka hlutafé félagsins um 50 milljarða króna að nafnverði eða jafngildi þeirrar fjárhæðar í evrum. Óskað er eftir því að hluthafar falli frá forkaupsrétti sínum.

Í tilkynningu til Kauphallar Íslands kemur fram að á hlutahafafundinum verður meðal annars farið yfir stöðu og horfur og borin fram tillaga um heimild stjórnar fyrir hönd félagsins að undirgangast fjárskuldbindingar sem breyta má í hlutafé í félaginu og heimild til hækkunar hlutafjár í samræmi við það. Tillaga um heimild stjórnar til kaupa á eigin bréfum og tillaga um heimild stjórnar til ótakmarkaðrar sölu á eignum félagsins.

Exista hf. mun birta afkomu þriðja ársfjórðungs eftir lokun markaða
fimmtudaginn 27. nóvember næstkomandi. Lokað var fyrir viðskipti með Exista í Kauphöll Íslands þann 6. október sl. og er ekki enn hægt að eiga viðskipti með félagið.Stærsti hluthafinn í Exista er Bakkabræður Holding sem á 45,2 % hlut en eigandi félagsins eru bræðurnir Ágúst og Lýður Guðmundssynir. Annar stærsti hluthafinn, samkvæmt vef Exista er Kista með 7,2% hlut.