Eftir Þorbjörn Þórðarson thorbjorn@mbl.is

Hinn 14. október stofnaði Logos lögmannsstofa fimm ný einkahlutafélög. Eitt þessara félaga, ELL 182 ehf., er félag sem var síðan selt Bakkabræðrum, þeim Ágústi og Lýði Guðmundssyni, umbjóðendum stofunnar.

ELL 182 ehf. keypti síðan 45% hlut Exista í Bakkavör, 855.151.478 hluti á genginu 9,79 kr. á hlut, sem var dagslokagengi í Bakkavör Group hinn 8. október sl. Kaupverðið var því tæpir 8,4 milljarðar. Ekki liggur fyrir hvernig ELL 182 ehf. fjármagnaði kaupin, en hlutafé félagsins var 500.000 kr. við stofnun. Samkvæmt upplýsingum frá Logos lögmannsstofu á stofan mörg félög, svipuð ELL 182 ehf., sem eru síðan seld umbjóðendum stofunnar. Þessi félög eru það sem í daglegu tali er kallað „skúffufélög“.

Ingvar Vilhjálmsson, fyrrverandi framkvæmdastjóri markaðsviðskipta hjá Kaupþingi, átti stóran hlut í bankanum sem hann síðan færði í einkahlutafélag í sinni eigu. Samkvæmt upplýsingum frá Kaupþingi var starfsmönnum óheimilt að hafa hluti, sem þeir áttu í fyrirtækinu sem þeir unnu hjá, í einkahlutafélagi, heldur urðu þeir að vera sjálfir skráðir fyrir hlutnum.

Var þetta fyrirkomulag samkvæmt reglum Fjármálaeftirlitsins og var þar vísað til gagnsæissjónarmiða. Þessu var síðan breytt og þeim starfsmönnum sem vildu færa bréf sín inn í einkahlutafélag var gert kleift að gera slíkt með samþykki regluvarðar og innri endurskoðanda.