Nýju bankarnir keyptu út skuldabréf sem voru í peningamarkaðssjóðum Glitnis, Landsbanka og Kaupþings áður en greitt var úr þeim. Samkvæmt heimildum Morgunblaðsins greiddu nýju bankarnir um 200 milljarða króna fyrir öll bréf í sjóðunum.

Nýju bankarnir þrír eru allir að fullu í eigu íslenska ríkisins.

Skuldabréf í smærri peningamarkaðssjóðum hjá fyrirtækjum á borð við SPRON, MP fjárfestingar, Íslensk verðbréf og Byr hafa ekki verið keypt út. Þeir sjóðir hafa ekki tilkynnt hvert útgreiðsluhlutfall þeirra verður.

Viðskiptanefnd tók fyrir sjóði

Peningamarkaðssjóðirnir voru teknir fyrir í viðskiptanefnd Alþingis í byrjun þessarar viku. Fulltrúar Kaupþings og Glitnis komu fyrir nefndina á mánudag og fulltrúi Landsbankans á þriðjudag. Höskuldur Þórhallsson, þingmaður Framsóknarflokksins, óskaði eftir því að nefndin fjallaði um sjóðina. Hann er ekki ánægður með þær upplýsingar sem þar komu fram. „Það skiptir miklu máli að gæta jafnræðis milli allra þeirra sem eiga í peningamarkaðssjóðum. Fullt af fólki á í smærri sjóðunum sem ríkið kemur ekkert að. Þess utan er ég á þeirri skoðun að þegar um svona háar fjárhæðir er að ræða þurfi að fjalla um afgreiðslu sem þessa í þinginu.“

Skuldabréfin sem ríkisbankarnir keyptu úr sjóðunum eru bæði bankabréf og skuldabréf fyrirtækja. Samkvæmt heimildum Morgunblaðsins eru útgefendur fyrirtækjabréfanna meðal annars Stoðir, Exista, Atorka, Milestone og Straumborg.

Keypt á yfirverði

Stoðir eru sem stendur í greiðslustöðvun og forsvarsmenn Exista hafa sagt opinberlega að framtíð þess félags sé í óvissu. Flest bankabréfanna voru síðan gefin út af Landsbankanum, Kaupþingi og Glitni sem allir eru í eigu ríkisins í dag. Þau skuldabréf eru að mestu talin verðlaus.

Utanaðkomandi endurskoðendur voru fengnir til að meta bréfin fyrir stjórnir bankanna áður en þau voru keypt. Þeir skiluðu síðan ákveðnu verðmati og á grunni þess voru bréfin keypt út úr sjóðunum. Heimildir Morgunblaðsins herma að bréfin hafi flest verið keypt á verði sem ógjörningur væri að fá fyrir þau ef kaupandinn væri annar en bankar í eigu ríkisins.

Ríkisbankarnir þrír tilkynntu í síðustu viku hversu mikið þeir myndu greiða þeim sem áttu í peningamarkaðssjóðunum til baka. Útgreiðsluhlutfall þeirra var á bilinu 68,8 til 85,3 prósent og því rýrnuðu þeir allir þrátt fyrir að búið væri að kaupa öll bréf út úr þeim.

Það voru þó fleiri aðilar sem héldu úti peningamarkaðssjóðum en þjóðnýttu bankarnir. Spron, MP fjárfestingabanki, Byr og Íslensk verðbréf gerðu það líka. Enginn þeirra hefur enn greitt viðskiptavinum sínum út úr sjóðunum. Samkvæmt gögnum sem Morgunblaðið hefur undir höndum og voru tekin saman fyrir viðskiptaráðuneytið er reiknað með að útgreiðsluhlutföll í þeim verði á bilinu 42,5 til 88,2 prósent. Í gögnunum er reiknað með að mesta rýrnunin verði á sjóðum SPRON.