Friðrik Tryggvason

Eftir Þórð Snæ Júlíusson thordur@mbl.is

„Þær ákvarðanir sem voru teknar í stjórn bankans varðandi Sjóð 9 voru gerðar í samráði við fulltrúa nýrra eigenda bankans, það er fjármálaráðherra og forsætisráðherra. Að öðru leyti tjái ég mig ekki um það sem fram fór á stjórnarfundum bankans,“ segir Þorsteinn Már Baldvinsson, fyrrverandi stjórnarmaður Glitnis, um uppkaup á bréfum Stoða úr verðbréfa- og fjárfestingasjóðum Glitnis í lok september.

Sjóðunum var lokað í kjölfar þess að tilkynnt var að íslenska ríkið ætlaði að setja um 85 milljarða króna inn í Glitni í staðinn fyrir 75 prósenta eignarhlut.

Sigurður G. Guðjónsson, sem einnig sat í stjórn Glitnis þar til að bankinn var þjóðnýttur staðfestir þetta og segir auk þess að ríkisfé hafi verið notað til að kaupa út bréfin. „Það komu tilmæli frá Geir H. Haarde og Árna Mathiesen til stjórnar Glitnis um að það kæmu ellefu milljarðar króna af þessari fjárfestingu ríkisins í Glitni og að þeir yrðu notaðir til þess að kaupa út 22 milljarða króna af ónýtum kröfum úr sjóðunum.“

Þegar sjóðirnir voru opnaðir á ný 1. október var búið að kaupa öll skuldabréf Stoða, stærsta eiganda Glitnis á þeim tíma, út úr þeim. Opinberlega hefur því verið haldið fram að Glitnir hafi keypt út bréfin. Sigurður segir það hins vegar ekki alveg rétt. Hluti peninganna sem notaðir voru til þess hafi komið frá ríkissjóði eða Seðlabankanum. „Þetta fór þannig fram að við vorum kallaðir á stjórnarfund þriðjudaginn 30. september eftir að sjóðirnir höfðu verið lokaðir á mánudeginum og þriðjudeginum. Vilji okkar sem vorum í stjórn Glitnis þá var að þeir yrðu lokaðir þangað til ríkið væri orðið hluthafi í bankanum. Það voru síðan stjórnarformaðurinn og forstjórinn sem báru okkur þessi skilaboð frá ríkinu.“

Böðvar Jónsson, aðstoðarmaður Árna Mathiesen fjármálaráðherra, segir Árna hafna því algjörlega að tilmælum um uppkaup á bréfum með ríkisfé hafi verið beint til stjórnar Glitnis. Kristján Kristjánsson, upplýsingafulltrúi forsætisráðherra, segir að Geir H. Haarde vilji ekki tjá sig um málið að sinni.

Athugun FME stendur enn yfir

Athugun FME hófst fyrir réttum tveim vikum síðan. Samkvæmt upplýsingum Morgunblaðsins þótti ekki tryggt að bótasjóðir félaganna stæðu jafntraustum fótum og forstjórar félaganna höfðu áður gefið til kynna í fjölmiðlum.

Tryggingafélögin könnuðust hins vegar ekki við að þau væru undir sérstakri smásjá eftirlitsins, athugunin væri almenns eðlis, og sögðu stöðu bótasjóðanna góða.

Í svari frá FME við fyrirspurn blaðamanns segir að áframhaldandi eftirfylgni standi yfir með það að markmiði að hafa sem besta yfirsýn yfir fjárhagsstöðu vátryggingafélaga.

Ekki fékkst upp gefið að hvaða atriðum í rekstri félaganna athugun eftirlitsins beindist. Ekki fengust upplýsingar um hvort eftirlitið hefði áhyggjur af stöðu tryggingafélaganna eða hvort ástæða væri til að ætla að þau gætu ekki staðið undir skuldbindingum sínum gagnvart vátryggingatökum. Áhyggjufullir tryggingatakar sem höfðu samband við Morgunblaðið sögðu að FME yrði að upplýsa um hvernig skoðun eftirlitsins á tryggingafélögunum hefði miðað og hver væri fjárhagsstaða þeirra.

thorbjorn@mbl.is