Ari verður yfir fjölmiðlum
Frá hluthafafundi 365 í vikunni þar sem nafni félagsins var breytt í Íslenska afþreyingu. mbl.is
„Við bíðum eftir niðurstöðu Samkeppniseftirlitsins um samruna Árvakurs og Fréttablaðsins,“ segir Ari Edwald, forstjóri 365 miðla, spurður hvort afstaða eigenda 365 miðla sé óbreytt eftir breytingar á eignarhaldi félagsins.
„Það er bara tvennt sem getur komið í veg fyrir þennan samruna. Neikvæð afstaða Samkeppniseftirlits eða neikvæð afstaða hluthafafundar Árvakurs. Þetta er ekki í okkar höndum,“ segir Ari.
Með kaupum Nýrrar sýnar ehf., sem er í eigu Jóns Ásgeirs Jóhannessonar, á fjölmiðlahluta 365 hf., 365 miðlum, verða litlar breytingar á högum Ara. Hann verður stjórnarformaður Íslenskrar afþreyingar í nýrri stjórn félagsins, eins og greint var frá í Morgunblaðinu í gær, og hann verður jafnframt forstjóri 365 miðla.
