Tap SPRON á fyrstu níu mánuðum ársins nam 16,5 milljörðum króna, en á sama tímabili í fyrra var 9,3 milljarða króna hagnaður á rekstri bankans. Á þriðja ársfjórðungi á þessu ári var ríflega þriggja milljarða króna tap á rekstri bankans, samanborið við 850 milljóna króna tap á sama tímabili í fyrra.

Eigið fé bankans var við lok september á þessu ári 10,4 milljarðar króna, en var 27,8 milljarðar í upphafi árs.CAD eiginfjárhlutfall var 10,1% í lok september, en var 13,4% á sama tíma í fyrra.

Rekstrarkostnaður dróst töluvert saman á tímabilinu og nam 1,6 milljörðum króna, samanborið við 4,2 milljarða á fyrstu níu mánuðum árs 2007.

Heildarútlán til viðskiptamanna námu 206, 5 milljörðum króna og voru innlán 45% af heildarútlánum.

„Afkoman fyrir ársfjórðunginn endurspeglar stöðuna fyrir hrun viðskiptabankanna þriggja og var tap bankans á ársfjórðunginum 3 milljarðar og eiginfjárhlutfallið rúmlega 10% sem er viðunandi miðað við erfiðar aðstæður á fjármálamörkuðum. Fall bankanna og afleiðingar þess eru ekki enn að fullu komnar fram og munu snerta öll fyrirtæki og heimili í landinu. SPRON hefur ekki farið varhluta af því en aðstæður gera það að verkum að erfitt er að meta verðmæti eigna og aðrar stærðir af fullri nákvæmni. Við höfum hins vegar gripið til aðgerða til að styrkja stöðu SPRON með langtímahagsmuni bankans að leiðarljósi og að því ferli koma allir helstu hagsmunaðilar. Niðurstöður þeirra aðgerða er að vænta innan skamms,“ segir Guðmundur Hauksson, forstjóri SPRON í tilkynningu.