Verð á hráolíu hækkaði í viðskiptum í Asíu í morgun eftir að forseti OPEC samtakanna útilokaði ekki að tilkynnt yrði um verulegan samdrátt í framleiðslu hjá olíuríkjunum innan samtakanna síðar í mánuðinum. Verð á hráolíu til afhendingar í janúar hækkaði um 2,45 dali í 43,26 dali tunnan í rafrænum viðskiptum á NYMEX markaðnum í New York í morgun. Á föstudag lækkaði hráolíuverð um tæpa 3 dali og endaði í 40,81 dal tunnan. Fór olíuverð niður í 40,50 dali tunnan fyrr á föstudeginum og hefur ekki verið lægra síðan í desember 2004.

Chakib Khelil, forseti OPEC, sagði um helgina að ekki væri loku fyrir það skotið að samtökin myndu tilkynna um verulegan samdrátt í framleiðslu á fundi sínum í Alsír þann 17. desember næstkomandi. Hann gaf ekki upp um hve mikið yrði dregið úr framleiðslunni en sérfræðingar á olíumarkaði telja að samdrátturinn geti numið allt að 2 milljónum tunna á dag. Verð á hráolíu hefur lækkað um 70% frá því það fór hæst í 147,27 dali tunnan um miðjan júlímánuð.

Í Lundúnum hefur tunnan af Brent Norðursjávarolíu hækkað um 1,96 dali tunnan í 41,70 dali í morgun.