Icesave reikningur Landsbankans Retuers

Eftir Þórð Snæ Júlíusson thordur@mbl.is

Þáttur Icesave-reikninga Landsbankans í falli íslenska bankakerfisins verður tekinn til rannsóknar hjá nýlega skipaðri rannsóknarnefnd Alþingis.

Að sögn Páls Hreinssonar, hæstaréttardómara og formanns rannsóknarnefndarinnar, er meginhlutverk hennar að draga upp heildarmynd af aðdraganda að falli bankanna og svara þeirri spurningu hverjar hafi verið orsakir þess. „Í þessu sambandi er augljóst að þáttur Icesave-reikninganna verður til rannsóknar hjá nefndinni þegar aðdragandi að falli bankanna er rannsakaður.“

Lokið var að skipa í nefndina þann 30. desember síðastliðinn. Næstkomandi föstudag verður haldin kynning á skipun og störfum nefndarinnar fyrir fjölmiðla. Í nefndinni sitja Páll Hreinsson hæstaréttardómari, sem er formaður hennar, Tryggvi Gunnarsson, umboðsmaður Alþingis, og Sigríður Benediktsdóttir, kennari við hagfræðideild Yale-háskólans í Bandaríkjunum.

Geta sótt gögn frá Hollandi

Líkt og Morgunblaðið greindi frá í gær stendur nú yfir rannsókn á ábyrgð hollenskra stjórnvalda á vexti Icesave-reikninganna þar í landi að beiðni hollenska þingsins. Tveir lagaprófessorar hafa frá því í byrjun desember rannsakað hvort hollenski seðlabankinn, sem fjármálaeftirlit landsins heyrir undir, sé ábyrgur fyrir því að ekki var tekið með réttum hætti á málinu.

Samkvæmt lögum um rannsókn á aðdraganda og orsökum falls íslensku bankanna sem samþykkt voru í desember hefur íslenska rannsóknarnefndin heimild til þess að óska beint eftir gögnum og upplýsingum frá erlendum stjórnvöldum í tengslum við rannsókn sína. Íslenskum stjórnvöldum ber að „veita atbeina sinn til slíkrar gagna- og upplýsingaöflunar ef nefndin óskar eftir því“.

Heimildir Morgunblaðsins í Hollandi herma að skýrslu um rannsóknina þar verði skilað á vormánuðum.