Skilaskilda á erlendum gjaldeyri samkvæmt gjaldeyrishöftum, sem nú gilda á Íslandi, er ekki eins dramatísk og var á árum áður. Þetta kom fram í máli Sigríðar Logadóttur, aðallögfræðings Seðlabanka Íslands á Skattadegi Deloitte, sem stendur yfir á Grand Hotel í dag.

Bendir Sigríður á að ekki felist í skilaskyldunni söluskylda á viðkomandi gjaldeyri, en skilaskyldan tekur til erlends gjaldeyris sem verður til við sölu á vörum eða þjónustu íslenskra aðila erlendis. Ber viðkomandi aðila að skila gjaldeyrinum inn á reikning hjá innlendri fjármálastofnun innan tveggja vikna frá því að einstaklingurinn eða fyrirtækið fékk gjaldeyrinn í hendur

Ekki sitja þó allir við sama borð hvað þetta varðar því nokkrir aðilar eru undanþegnir skilaskyldunni og ber þar helst að nefna ríki, sveitarfélög og fyrirtæki í meirihlutaeigu ríkis eða sveitarfélaga. Þá eru félög, sem starfa á sviði olíuleitar, undanþegin skilaskyldunni.

Segir Sigríður að Seðlabankinn fylgist vel með því hve vel aðilar á markaði fylgi reglunum og hafi nú þegar vísað máli til Fjármálaeftirlitsins, sem hefur heimild til að sekta þá sem gerast brotlegir við reglurnar. Fjármálaeftirlitið rannsakar þau mál, sem Seðlabankinn tilkynnir eftirlitinu.