Dauft yfir Davos í ár
World Economic Forum í Davos í Sviss hófst formlega í dag í skugga verstu fjármálakreppu sem heimurinn hefur staðið frammi fyrir frá því í kreppunni miklu í kringum 1930 og þar sem sérfræðingar keppast við að vara umheiminn við verndunarstefnu ásamt væntingum að ýmsar aðgerðir stjórnvalda til að örva efnahagslífið geti fengið hjólin í stærstu hagkerfum heims til að snúast á ný.
Það þykir mun daufara yfir þessum snævi þakta fundarstað í svissnesku Ölpunum en alla jafnan þar sem ríkir yfirleitt glaumur og gleði. Víðsfjarri nú eru ýmsir af helstu leikurunum í efnahagshruninu svo og helstu efnahagsráðgjafar hinnar nýju ríkisstjórnar Barack Obama.
Hagfræðingurinn Stephen Roach setti fram svarta spá um efnahagshorfur heimsins, sagði að efnahagsvöxturinn á heimsvísu næstu þrjú árin yrði líklega aðeins um 2,5% - sem stjórnarformaður Morgar Stanley í Asíu og Davos-gestur til margra ára kallaði þetta „nánast kreppu“. Til samanburðar þá hefur verið um 5% vöxtur í heiminum síðustu fjögur og hálft ár.
En jafnvel áðurnefnd spá þótti af mörgum vera í bjartsýnni lagi.
Sérfræðingar voru sammála um að aðgerðir sem gripið hafði verið til af hálfu þróaðri landa til að örva vöxtinn hefðu ekki verið nógu umfangsmiklar til að koma heiminum út úr núverandi kreppu.
Á meðal 2500 þátttakenda í Davos eru 40 þjóðarleiðtogar sem munu ræða þema fundarins sem í þetta sinn er mótun heimsins að lokinni kreppu - á sviðum eins og orkumálum, loftlagsbreytingum og frjálsri verslun. Meðal leiðtoganna má nefna kínverska forsetann Wen Jiabao, Gordon Brown, forsætisráðherra Breta. Jose Manuel Barroso, forseta framkvæmdastjórnar ESB, Angela Merkel, kannslari Þýskalands og Taro Aso, forsætisráðherra Japan.
Forsætisráðherra Rússlands, Vladimir Putin, verður með aðalræðuna í kvöld á sama tíma að orkujöfrar heima fyrir eru að drukkna í skuldum og olíuverð fer lækkandi. Hann tekur síðan þátt í pallborðsumræðum með Peter Brabeck-Letmathe,forstjóra Nestle AG , Michael Dell tölvuframleiðenda og Carlos Ghosn, forstjóra Renault-Nissan.
Það er tímanna tákn að engir heimsfrægir skemmtikraftar hafa verið fengnir til að hafa ofan af fyrir ráðstefnugestum en áður hafa Angelina Jolie, Sharon Stone og Bono verið í því hlutverki.
