Var aðvarað vegna Kaupþings

Breska fjármálaeftirlitið var árið 2005 aðvarað um að gefa ekki grænt ljós á yfirtöku Kaupþings á fjármálafyrirtækinu Singer & Friedlander. Aðvörunin kom frá Tony Shearer, þáverandi forstjóra Singer & Friedlander.

Þetta kemur fram á vef breska blaðsins Times, en þar segir að Shearer muni á morgun koma fram fyrir rannsóknarnefnd á vegum breska fjármálaeftirlitsins og lýsa því þar yfir að stjórnendur Kaupþings væru ekki hæfir til að taka yfir rekstur fyrirtækisins.

Segir á vef blaðsins að málið veki á ný spurningar um regluverkið sem smíðað var um fjármálamarkaðina.

Vísar blaðið til minnisblaðs til nefndarmanna í áðurnefndri rannsóknarnefnd, sem lekið var til fréttastofu sjónvarpsstöðvarinnar Channel 4 News, þar sem segir að flestir, „ef ekki allir“ stjórnarmenn Singer & Friedlander hafi deilt þessum áhyggjum með Shearer.

Breska fjármálaeftirlitið hefur brugðist við þessum ásökunum með yfirlýsingu þar sem ítrekað er að það heimili aðeins slík viðskipti að uppfylltum kröfum og að minnisblaðið endurspegli ekki á réttan hátt þá atburðarás sem fram fór við söluna.

Frétt The Times 

• 3 blogg um fréttina

Bloggað um fréttina

• Stefán Friðrik Stefánsson: Breskar aðvaranir og sjálfskaparvítið mikla
• Finnur Bárðarson: Óhæfir bankamenn
• Lára Hanna Einarsdóttir: Flórinn er botnlaus