Stjórnin deildi áhyggjum Shearers varðandi Kaupþing
Tony Shearer, fyrrverandi forstjóri Singer & Friedlander. Reuters
Fyrrverandi stjórn Singer & Friedlander deildi áhyggjum Tony Shearers, fyrrverandi forstjóra, um að stjórnendur Kaupþings væru ekki hæfir til þess að stýra breskum banka. Hann segir Sigurð Einarsson hafa boðið sér stöðu stjórnarformanns í fyrirtækinu eftir kaupin, en hann sagði hins vegar starfi sínu lausu áður en til þess kom. Þetta er meðal þess sem kemur fram í skriflegri yfrlýsingu Shearers sem lögð var fram í dag fyrir breska þingnefnd sem rannsakar m.a störf breska fjármálaeftirlitsins.
„Aðal málið fyrir mér, þegar ljóst var að að Kaupþing myndi bjóða nægilega háa upphæð í reiðufé, var hvort breska fjármálaeftirlitið [FSA] og aðrar eftirlitsstofnanir myndu samþykkja að stjórn bankans yrði í höndum Kaupþings,“ segir Shearer í yfirlýsingunni.
„Mín stutta reynsla var sú að að stjórnendur Kaupþings væru ekki hæfir stjórnendur til þess að stýra breskum banka. Flestir, ef ekki allir stjórnarmenn Singer & Friedlander, deildu þessari skoðun minni með mér. Ég hafði áhyggjur af því að ef stjórnin samþykkti tilboð frá Kaupþing og fjármálaeftirlitið [FSA] hafnaði þeim sem óhæfum og ótilhlýðlegum stjórnendum, þá myndum við allir líta heimskulega út,“ skrifar Shearer.
Hann segist hafa haft samband við FSA og tilkynnt þeim sína skoðun. Aðrir stjórnendur Singer & Friedlander hafi einnig haft samband við FSA og lýst sambærilegum áhyggjum. Shearer segir að FSA hafi flýtt samþykki sínu fyrir yfirtökunni í gegn og tilboð Kaupþings í bankann hafi því verið óskilyrt. Stjórnarskiptin gátu því átt sér stað óáreitt.
Regluvörður og yfirmaður áhættustýringar reknir fyrir að kvarta
„Ég held að FSA hafi haft fullnægjandi upplýsingar um Kaupþing þannig að þeir hefðu aldrei átt að samþykkja stjórnarskiptin, og ef þeir ætluðu á annað borð að samþykkja þau þá hefðu þeir átt að framkvæma ítarlega frekari athugun á Kaupþingi. Einnig, ef niðurstaðan hefði orðið sú að samþykkja stjórnarskiptin þá hefðu þeir átt að fylgjast náið með því sem var orðið að Kaupþing Singer & Friedlander. Þeir hefðu átt að bregðast við þegar bæði yfirmaður áhættustýringar og regluvörður Kaupþings Singer & Friedlander voru seinna reknir fyrir að lýsa yfir áhyggjum sínum með það hvernig fyrirtækinu var stjórnað og sérstaklega afstöðu þess gagnvart áhættutöku,“ segir Shearer.
Shearer bendir á að Sigurður Einarsson hafi boðið honum stöðu stjórnarformanns hjá Kaupþingi Singer & Friedlander, eftir yfirtökuna. „Áður en tilboðið barst hluthöfum ákvað ég að segja starfi mínu lausu, eftir stuttan reynslutíma, á þeim grundvelli að ég var ekki tilbúinn að axla ábyrgð gagnvart breska fjármálaeftirlitinu á fyrirtæki sem var í eigu Kaupþings og þar sem stefnumörkun og daglegur rekstur var undir ríkum áhrifum frá þeim Íslendingum sem í hlut áttu. Í tilkynnti Sigurði Einarssyni þetta og yfirgaf Singer & Friedlander hinn 30. nóvember 2005,“ segir Shearer.
Frá skrifstofu Kaupþings Singer & Friedlander í Lundúnum. Golli / Kjartan Þorbjörnsson
