Skilanefnd Landsbankans taldi áform eigenda og stjórnenda Baugs Group um fjárhagslega endurskipulagningu félagsins ekki raunhæf og ákvað því á þriðjudag að leggja fram beiðni um greiðslustöðvun BG Holding, dótturfélags Baugs Group, fyrir breskan dómstól.

Á meðal eigna BG Holding eru stærstu fjárfestingar Baugs í Bretlandi: Iceland Foods, House of Frasier og leikfangaverslunarkeðjan Hamleys. Yfir 50 þúsund manns starfa fyrir Baug í Bretlandi.

Heimildir Morgunblaðsins herma að viðræður milli skilanefndarinnar, sem er langstærsti kröfuhafi Baugs, og félagsins hafi ekki skilað neinu og því hafi verið ákveðið að grípa til aðgerða til að hámarka virði eigna. Þá vildi skilanefndin einnig verða fyrri til að leggja fram greiðslustöðvunarbeiðnina í Bretlandi.

Snýst um ökumannssætið

Sá aðili sem leggur fram greiðslustöðvunarbeiðnina fær nefnilega að skipa þá aðstoðarmenn sem stýra félaginu á meðan það er í greiðslustöðvun. Hefðu forsvarsmenn Baugs verið fyrri til að óska eftir greiðslustöðvuninni hefðu þeir fengið að skipa aðstoðarmennina. Beiðnin verður tekin fyrir á föstudag, klukkan tíu.

Heimildir Morgunblaðsins herma að forsvarsmenn Baugs hafi tekið útspili skilanefndarinnar afar illa. Stjórnendur félagsins brugðust enda við með því að óska eftir greiðslustöðvun fyrir félagið og nokkur dótturfélög þess, þar á meðal BG Holding, hér á Íslandi. Í tilkynningu frá Baugi vegna þessa segir að gripið hafi verið til þessara aðgerða í „kjölfar ákvörðunar Landsbankans í gær [þriðjudag] að hætta viðræðum um mögulega endurskipulagningu Baugs“. Sú beiðni verður tekin fyrir í dag.

Vilja greiðslustöðvun á Íslandi

Verði beiðnin samþykkt mun það þýða að núverandi stjórnendur munu áfram reka fyrirtækið og hafa umsjón með eignum þess í allt að sex mánuði. Fulltrúar skilanefndarinnar og Baugs funduðu í London í gær en sá fundur skilaði ekki neinni niðurstöðu.

Þó að reglan við uppskiptingu föllnu viðskiptabankanna í nýja og gamla hafi verið sú að útlán til íslenskra félaga væru í nýju bönkunum eru undantekningar frá þeirri reglu. Skuldir Baugs við Landsbankann og Glitni, eru til dæmis báðar í gömlu bönkunum og því á forræði skilanefnda þeirra. Ástæðan er stærð þeirra.

Öllum sagt upp á Íslandi

Baugur sagði upp öllum fimmtán starfsmönnum sínum á Íslandi í lok síðustu viku og tilkynnti að skrifstofu félagsins á Íslandi yrði lokað. Sömuleiðis yrði starfsmönnum félagsins í Bretlandi fækkað um helming, úr 29 í 16.

Gunnar Sigurðsson, forstjóri félagsins, sagði þá að verið væri að laga starfsemi Baugs Group að breyttum aðstæðum, enda væri stærsti hluti eigna félagsins í Bretlandi.

Hefur lítil áhrif á smásölu á Íslandi

Baugur Group var um tíma umsvifamesti smásöluaðili á Íslandi og átti hér tugi verslana undir ýmsum nöfnum. Flestar þeirra heyra undir eignarhaldsfélagið Haga sem reka meðal annars Bónus, Hagkaup, 10-11, Húsasmiðjuna, Blómaval og Útilíf.

Hagar voru hins vegar seldir til fjárfestingafélagsins Gaums í júlí síðastliðnum og því eru verslanir félagsins ekki hluti af þeim eignum sem eru undir í greiðslustöðvuninni. Eigendur Gaums eru Jón Ásgeir Jóhannesson, Kristín Jóhannesdóttir, systir hans, og foreldrar þeirra. Gaumur er einnig stærsti einstaki eigandi Baugs Group. Töluverðar breytingar voru einnig gerðar á eignarsafni Baugs Group í fyrravor. Þá færði félagið stærstu skráðu eignir sínar á Íslandi yfir í tvö systurfélög sem kallast Styrkur Invest og Stoðir Invest. Allar fjölmiðla-, tækni og fjarskiptaeignir Baugs fóru þá inn í Stoðir Invest. Þar á meðal voru eignarhlutir Baugs í 365 og Teymi, sem á meðal annars Vodafone.

Eign félagsins í FL Group, sem síðar var endurnefnt Stoðir, var rennt inn í Styrk Invest. Stoðir eru sem stendur í greiðslustöðvun.

Baugur Group skuldaði alls 201 milljarð íslenskra króna í árslok 2007 samkvæmt ársreikningi

Skuldir Baugs Group og dótturfélaga þess námu um 201 milljarði króna í árslok 2007. Þær höfðu þá aukist úr 102 milljörðum króna frá árinu á undan. Þetta kemur fram í nýlega birtum ársreikningi félagsins fyrir það ár. Engar opinberar upplýsingar eru til um núverandi skuldastöðu félagsins.

Samkvæmt ársreikningnum námu lánveitingar til Baugs Group alls 176 milljörðum króna og þar af áttu um 65 milljarðar króna að vera á gjalddaga í fyrra, tæpir 26 milljarðar króna í ár og 30 milljarðar króna á næsta ári.

Jón Ásgeir Jóhannesson, aðaleigandi Baugs, sagði í blaðagrein í Morgunblaðinu í lok síðasta árs að skuldir Baugs við innlendar lánastofnanir um mitt ár 2008 hefðu numið um 160 milljörðum króna.

Í ársreikningnum kemur einnig fram að Glitnir hafi veitt Baugi Group fimmtán milljarða króna víkjandi lán á árinu 2007 og að Kaupþing hafi veitt félaginu sambærilegt lán upp á 4,8 milljarða króna. Bæði lánin áttu að koma til greiðslu á árinu 2013. Fasteignafélagið Stoðir, sem í dag heitir Landic Property og er meðal annars í eigu sömu aðila og eiga Baug, veitti félaginu 3,3 milljarða króna víkjandi lán.

Í ársreikningnum eru eignir Baugs sagðar hafa verið um 314 milljarða króna virði. Langstærsta skráða eign þeirra, Stoðir, var metin á 72,2 milljarða króna. Stærsta eign Stoða var ráðandi hlutur í Glitni sem varð að engu við fall bankanna. Eignarhlutur í 56 óskráðum félögum var bókfærður á 152,4 milljarða króna en verðmat á einstökum félögum kom hins vegar ekki fram í ársreikningnum heldur var einungis hægt að sjá eignarhlutfall Baugs í hluta fyrirtækjanna.