Um leið og Kaupþing í Lúxemborg verður starfhæft að nýju mun nýr eigandi, opinber líbískur fjárfestingarsjóður, endurvekja einkabankaþjónustu og eignastýringarsvið bankans. Þetta kemur fram í bréfi Magnúsar Guðmundssonar, forstjóra Kaupþings í Lúxemborg, og Björns Jónssonar aðstoðarforstjóra. Bréfið er dagsett 2. febrúar sl.

Þar segir að mikilvægum áfanga hafi verið náð í endurskipulagningu bankans í þessari viku þegar Hæstiréttur Lúxemborgar tók ákvörðun sem auðveldar endurskipulagningu millibankalána.

Samningur undirritaður

Samkomulag var nýlega undirritað við hinn opinbera líbíska fjárfestingarsjóð um kaup á útibúinu með það fyrir augum að halda áfram rekstri Kaupþings í Lúxemborg sem sjálfstæðri einingu. Samkomulagið var gert með samþykki stjórnvalda þar í landi. Kaupþing í Lúxemborg er ekki gjaldfært og það vantar fjármagn inn. Sett var af stað söluferli eftir að bankinn fór í greiðslustöðvun til að athuga hvort einhverjir hefðu áhuga og þeir sem sýndu slíkan áhuga voru skoðaðir af stjórnvöldum í Lúxemborg.

Í bréf tvímenninganna segir jafnframt að yfirtaka Líbíumannanna sé háð tveim skilyrðum. Annars vegar endurskipulagningu millibankalána og samþykki skilanefndar gamla Kaupþings. Samkvæmt heimildum Morgunblaðsins liggur engin ákvörðun fyrir um veitingu slíks samþykkis. Einnig er algjör forsenda að um millibankalánin semjist því ef um þau semst ekki skiptir samþykki skilanefndar líklega engu máli.

Breytir ekki aðgengi að upplýsingum úr útibúinu í Lúxemborg

Í bréfinu til viðskiptavina þakka Björn og Magnús sérstaklega fyrir þann skilning sem viðskiptavinir hafa sýnt. Og að þeir geri allt sem í þeirra valdi standi til þess að ljúka endurskipulagningu eins fljótt og hægt er. Þegar Morgunblaðið náði tali af Eggerti J. Hilmarssyni, yfirmanni lögfræðisviðs Kaupþings í Lúxemborg, vildi hann ekkert tjá sig um málið og vísaði á Magnús Guðmundsson. Ekki náðist í Magnús þrátt fyrir ítrekaðar tilraunir. Af lestri bréfsins til viðskiptavinanna má ráða að hinn líbíski fjárfestingarsjóður sé að eignast útibúið með velvilja forstjórans og aðstoðarforstjórans.

Fyrir liggur að mikið af upplýsingum er í útibúinu um íslenska viðskiptavini. Upplýsingar sem gætu reynst verðmætar við rannsókn á aðdraganda bankahrunsins. Einnig hafa ýmsir talið það óæskilegt að sömu stjórnendur og stýrðu bönkunum fái að stýra þeim að nýju eftir að einingar hafa verið seldar.

Páll Hreinsson, hæstaréttardómari og formaður rannsóknarnefndar Alþingis um aðdraganda og orsakir falls íslensku bankanna, segir að undir eðlilegum kringumstæðum eigi eigendaskipti á útibúi Kaupþings í Lúxemborg ekki að tefla í tvísýnu eða skerða aðgengi íslenskra stjórnvalda að upplýsingum úr útibúinu. „Gagnaöflunin fer fram á vegum Fjármálaeftirlitsins á grundvelli þeirra reglna sem gilda í Evrópusambandinu og á EES-svæðinu um gagnkvæma aðstoð við að upplýsa mál,“ segir Páll. FME mun því afla gagna frá Fjármálaeftirlitinu í Lúxemborg og rannsóknarnefndin hefur síðan aðgang að þeim ef svo ber undir. Páll segir að þessar rannsóknarheimildir ættu ekki að breytast við þetta. Það gildi strangar reglur um gagnavörslu í Lúxemborg eins og í flestum ríkjum.