Baugur stefnir í þrot
Húsnæði Baugs við Túngötu mbl.is/Rax
Eftir Þorbjörn Þórðarson og Björgvin Guðmundsson
Þeir sem þekkja til rekstrar Baugs Group segja að félagið sé gjaldþrota. Eigið fé sé neikvætt um 150 milljarða króna. Baugur sé í greiðslustöðvun sem geti endað á tvennan hátt. Annaðhvort gangi fjárhagsleg endurskipulagning upp, það komi inn nýtt eigið fé og kröfuhafar felli niður skuldir. Það er talið ólíklegt. Hin leiðin er að ósk um framlengingu greiðslustöðvunar verði hafnað og farið verði fram á gjaldþrotaskipti. Talið er líklegra að sú leið verði ofan á. Baugsævintýrinu myndi þá ljúka.
Skuldir Baugs Group við innlendar lánastofnanir eru 1.100 milljónir punda, að sögn Stefáns Hilmarssonar, fjármálastjóra Baugs, en fyrirtækinu var veitt greiðslustöðvun í Héraðsdómi Reykjavíkur í gær til 4. mars. Eignirnar á móti eru mun verðminni, samkvæmt heimildum Morgunblaðsins. Þrátt fyrir sölu á eignum fyrir yfir 60 milljarða króna síðastliðna tólf mánuði er eiginfjárstaðan neikvæð um 150 milljarða, samkvæmt bráðabirgðamati.
Stjórnendur Glitnis, Landsbankans og Straums hafa gert það sem þeir geta til að tryggja sína hagsmuni og gengið að veðum dótturfélaga Baugs í Bretlandi og Danmörku. Kaupþing er með veð í Högum eftir að hafa lánað Gaumi, félagi Jóns Ásgeirs Jóhannessonar og fjölskyldu, fyrir yfirtöku á félaginu í júlí í fyrra. Mun Kaupþing fylgja þeim veðkröfum fast eftir á næstunni, samkvæmt heimildum Morgunblaðsins. Kapphlaup kröfuhafa um takmörkuð verðmæti er hafið.
Samkvæmt heimildum er lítil von fyrir þá sem ekki eiga veðtryggðar kröfur á Baug að fá þær greiddar. Til dæmis eigi smærri fjármálafyrirtæki kröfur upp á um það bil 180 milljónir punda á félagið samanlagt, sem ekki eru veðtryggðar. Það jafngildir um 30 milljörðum króna. Stærstu kröfurnar eiga Sparisjóðabankinn, Byr og VBS fjárfestingarbanki, upp á samtals 72 milljónir punda eða tæpa 11 milljarða. Þetta er þungt högg fyrir þessi fyrirtæki. Kröfur annarra fjármálafyrirtækja eru lægri. Þá á Landic Property kröfu upp á 65 milljónir punda.
Agnar Hansson, forstjóri Sparisjóðabankans, staðfesti í samtali við Morgunblaðið að bankinn ætti mikið undir hjá Baugi.
„Þessi fyrirtæki áttu töluvert undir og þetta eru starfandi fyrirtæki í dag. Aðgerðir skilanefndar Landsbankans [að krefjast greiðslustöðvunar á BG Holding í Bretlandi] gera það að verkum að það verður töluvert tjón hjá þessum fyrirtækjum sem hefði ekki þurft að koma til. Tjón annarra kröfuhafa en Landsbankans verður miklu meira, því þeir eru aftar í röðinni,“ segir Stefán Hilmarsson.
