Ekki er hægt að útiloka að stýrivextir Seðlabanka Svíþjóðar verði lækkaðir í 0% en bankinn lækkaði stýrivexti í 1% í síðustu viku. Þetta sagði aðstoðarbankastjóri Seðlabanka Svíþjóðar, Lars Svensson í dag. Hann segir að eins og staðan er í dag þá sé verðhjöðnun og 0% vaxtastefna ekki líkleg en bankinn verði að undirbúa sig undir allar mögulegar aðstæður og hvernig bregðast verði við hinu versta.

Þegar bankastjórn Seðlabanka Svíþjóðar lækkaði stýrivexti þann 11. febrúar varaði hún við því að  mögulega þyrfti að lækka stýrivexti enn frekar á næstu sex mánuðum.

„Líkt og bæði Japan og Bandaríkin, sem eru með 0% stýrivexti, og fleiri ríki sem eru að lækka stýrivexti í næstum 0%, þá er eðlilegt að peningamálastefna með 0% stýrivexti verði meira inni í umræðunni," sagði Svenson. 

Svenson, sem er sérfræðingur aðstæðum sem kallast reiðufjár gildra (liquidity trap), en það er þegar verðhjöðnun og 0% stýrivextir fara saman, ástand sem Japanar þekkja vel, segir að sænski seðlabankinn verði að vera vel á verði og gera sitt til þess að draga úr líkum á því að bankinn standi frammi fyrir slíkum aðstæðum.

Svenson vann meðal annars skýrslu árið 2003 með nýverandi seðlabankastjóra Bandaríkjanna, Ben Bernanke , og nóbelsverðlaunahafanum í hagfræði 2008,  Paul Krugman, um slíkar aðstæður.