Fjármálaeftirlitin á Íslandi (FME) og í Bretlandi (FSA) framkvæmdu athugun á því hvort fjármagn hefði verið flutt með óeðlilegum hætti frá Kaupþing Singer&Friedlander og heim til móðurbankans í vikunni áður en hryðjuverkalögum var beitt gegn Íslandi, skv. heimildum Morgunblaðsins.

Niðurstaða þeirrar athugunar var að svo hefði ekki verið. Bresk yfirvöld grunuðu Kaupþing um slíka fjármagnsflutninga en gátu ekki sýnt fram á að þeir hefðu átt sér stað umfram það sem leyfilegt var.

Vissi ekkert hvað hann gerði

Morgunblaðið sagði frá því í gær að Alistair Darling, fjármálaráðherra Breta, hefði sagt á þingnefndarfundi hinn 3. nóvember síðastliðinn að bresk stjórnvöld hefðu beitt Íslendinga hryðjuverkalögum vegna samtals sem hann hefði átt við Árna Mathiesen, þáverandi fjármálaráðherra, hinn 7. október.

Árni hafnar skýringum Darlings algjörlega og segir þær vera eftiráskýringar. „Þetta er eftiráskýring hjá honum sem er sett fram eftir að samtalið kom í ljós. Þá fer hann að reyna að finna setningar í því sem hann getur hengt sig á. Ég held að í meginatriðum séu tvær ástæður fyrir því að þeir gerðu þetta. Bretarnir töpuðu peningum þegar Lehman Brothers bankinn féll, en þá voru fluttir peningar á milli London og New York, og þeir óttuðust að það gæti gerst hjá okkur. Síðan held ég að þetta hafi verið til heimabrúks til að sýna að þeir styddu við innstæðueigendur í Bretlandi. En þeir hafa ekkert fyrir sér í því að við ætluðum ekki að borga. Ég sagði það ekki og bréfið sem við sendum þeim segir annað. Ég held að hann sýni með þessu að hann hafi ekkert vitað hvað hann var að gera. Ég hafna því þessu algjörlega sem einhverri efnislegri skýringu.“

Fjármagn ekki flutt til baka

Darling sagði á sama þingnefndarfundi frá áhyggjum breskra stjórnvalda af því að það hefðu ekki verið nægjanlega miklir peningar inni í Kaupþingi í Bretlandi og að þarlendum stjórnvöldum hefði verið talin trú um að frekara fjármagn yrði flutt til baka til Bretlands. Það hefði hins vegar aldrei gerst.

Seðlabanki Íslands, að höfðu samráði við Geir H. Haarde, þáverandi forsætisráðherra, lánaði Kaupþingi 500 milljónir evra daginn áður en að hryðjuverkalögunum var beitt gegn Íslandi. Í athugasemd frá Seðlabankanum hinn 27. október segir að lánið hafi verið til nokkurra daga „í þeim tilgangi að aðstoða þann banka við að mæta kröfum breska fjármálaeftirlitsins og annarra þarlendra stjórnvalda vegna stöðu dótturfyrirtækis þess banka í Lundúnum.“

Hvorki náðist í Sigurð Einarsson, fyrrum stjórnarformann Kaupþings, né Ármann Þorvaldsson, fyrrum forstjóra Singer&Friedlander, í gær til að spyrja hvort fjármunirnir hefðu í raun verið færðir til Bretlands.