Sena á og rekur meðal annars Smárabíó mbl.is/Golli

Stjórn Íslenskrar afþreyingar hf. hefur, að undangengu formlegu söluferli, gengið að  tilboði  Garðarshólma rekstrarfélags í öll hlutabréfin í Senu. Tilboðið, sem er með fyrirvara um niðurstöður áreiðanleikakönnunar, metur heildarvirði Senu á 500 milljónir króna. 

Engar skuldir yfirteknar

Garðarshólmi, sem er í eigu Jóns Diðriks Jónssonar og Magnúsar Bjarnasonar, yfirtekur engar skuldir frá Íslenskri afþreyingu við söluna.

Straumur fjárfestingabanki hf. annaðist  formlegt söluferli  á Senu. Söluferlið hófst í  janúar s.l. og óskuðu þá 20 aðilar eftir formlegri þátttöku. Átta aðilar skiluðu inn óskuldbindandi tilboðum í félagið fyrir 5. febrúar s.l.  Í framhaldinu var gengið til viðræðna við þá er höfðu lagt fram hagstæðustu tilboðin en frestur þeirra til að skila inn bindandi tilboði rann út í gær, samkvæmt tilkynningu.

Íslensk afþreying hét áður 365 hf., en Sena er umboðs- og dreifingaraðili fyrir erlenda tónlist og tölvuleiki, útgefandi að íslenskri tónlist auk þess sem félagið á fjögur kvikmyndahús. 

Sena rekur verslanir Skífunnar og kvikmyndahúsin Smárabíó, Háskólabíó, Regnbogann og Borgarbíó Akureyri.

Gert er ráð fyrir aðkomu Björns Sigurðssonar framkvæmdastjóra Senu og lykilstjórnenda í kaupunum.

„Jón Diðrik Jónsson mun verða stjórnarformaður félagsins en hann hefur langa reynslu af neytendamarkaðsmálum í gegnum stjórnunarstörf hjá Coca-Cola í Asíu og Evrópu og sem forstjóri Ölgerðarinnar Egils Skallagrímssonar," samkvæmt tilkynningu.

Jón Diðrik Jónsson.