Hagnaður Lánasjóðs sveitarfélaga nam 1.225 milljónum króna á síðasta ári samanborið við 1.219 milljónir króna árið áður. Afkoma 2008 hefði verið mun betri ef ekki hefði komið til niðurfærslu að verðmæti 1.472 milljónir króna vegna afleiðusamninga sem sjóðurinn hafði gert við Glitni banka.

Háir vextir á innlendum markaði svo og mikil verðbólga skiluðu mjög góðri afkomu en eignir sem samsvara eigin fé sjóðsins eru að mestu bundnar í verðtryggðum útlánum. Ávöxtun á lausu fé var einnig góð, en mestur hluti þess var varðveittur í Seðlabankanum, samkvæmt tilkynningu til Kauphallar Íslands.

Útborguð langtímalán 15.505 milljónir á árinu

Meginhlutverk sjóðsins er að tryggja sveitarfélögum, stofnunum þeirra og fyrirtækjum lánsfé á hagstæðum kjörum. Útborguð langtímalán á árinu 2008 voru 15.505 m.kr. miðað við 4.047 m.kr. á fyrra ári. Skammtímalánveitingar sjóðsins námu hinsvegar 6.158 m.kr. á árinu en voru 5.840 m.kr. á fyrra ári.

„Aðstæður til töku langtímalána, bæði verðtryggðra og gengistryggðra, voru einstaklega óhagstæðar á árinu. Mikil aukning varð í eftirspurn eftir lánum hjá sjóðnum eftir fall bankanna og tókst sjóðnum að bregðast skjótt við og veita mikið af lánum á síðustu mánuðum ársins. Þar eiga lífeyrissjóðir landsins mikinn þátt sem þátttakendur í skuldabréfaútboðum sjóðsins.

Sjóðurinn hefur ekki tapað útláni frá því að hann hóf starfsemi árið 1967 og engin vanskil voru í árslok 2008," samkvæmt tilkynningu.

Eigið fé í árslok 2008 var 11.273 m.kr. á móti 10.048 m.kr. árið áður. Vegið eiginfjárhlutfall, svonefnt CAD-hlutfall, var í árslok 2008 57% en var 112% í árslok 2007, en þarf að vera 8% skv. lögum um fjármálafyrirtæki.

Gert er ráð fyrir að afkoma sjóðsins á árinu 2009 verði svipuð og árin 2008 og 2007. Aðstæður á lánsfjármörkuðum munu þó hafa úrslitaáhrif á möguleika sjóðsins til að koma til móts við lánsfjárþörf sveitarfélaganna á árinu. Allt kapp verður lagt á að tryggja lánshæfi sjóðsins og viðhalda því trausti sem fjárfestar hafa á skuldbindingum hans.