Vilja að slakað verði á kröfum
Eftir Bjarna Ólafsson bjarni@mbl.is
Framkvæmdastjórn Evrópusambandsins ætti að stytta þann tíma sem ríki þurfa að bíða til að fá aðgang að myntbandalagi sambandsins. Þetta er skoðun Thomasar Mirow, forseta Endurreisnar- og þróunarbanka Evrópu (EBRD).
Mirow, sem er fyrrverandi aðstoðarfjármálaráðherra Þýskalands, segir í samtali við þýska blaðið Handelsblatt, að hann vilji sjá biðtímann eftir evrunni styttan úr tveimur árum í eitt, að því gefnu að þau ríki sem sækja um aðild að myntbandalaginu uppfylli að öðru leyti reglur um aðgang. Í viðtalinu nefnir Mirow ríki Austur-Evrópu sérstaklega, en sum þeirra hafa orðið illa úti vegna fjármálakreppunnar í heiminum.
Sex ríki utan ESB með evru
Segir í frétt Reuters-fréttastofunnar í tilefni af viðtalinu við Mirow, að Pólverjar og Ungverjar hafi sérstaklega hvatt til þess að slakað verði á þeim kröfum sem uppfylla þurfi fyrir inngöngu.Eins og áður segir þurfa ríki að vera í myntbandalaginu (ERM 2) í tvö ár áður en þau geta formlega tekið upp evruna, en auk þess þurfa þau að uppfylla ákveðin skilyrði um verðbólgustig og opinber fjármál.
Endurreisnar- og þróunarbanki Evrópu var stofnaður árið 1991 til að aðstoða við endurreisn fyrrverandi kommúnistaríkja í álfunni með það að markmiði að stuðla að upptöku markaðsbúskapar í þeim. Bankinn er í eigu 61 ríkis.
Alls nota 16 ríki Evrópusambandsins evruna, en þá eru níu ESB-ríki til viðbótar skyldug til að taka hana upp innan tíðar. Er þar um að ræða Austur-Evrópuríkin og Svíþjóð. Danmörk og Bretland standa hins vegar fyrir utan evrusvæðið.
Athyglisvert er að þrjú smáríki, sem ekki eru í ESB, nota evru samkvæmt samkomulagi við sambandið, en það eru Vatíkanið, San Marínó og Mónaó. Þá hafa þrjú önnur ríki tekið evruna upp einhliða, en það eru Andorra, Svartfjallaland og Kósóvó.
