Seðlabanki Íslands. mbl.is/Golli

Skuldatryggingaálag íslenska ríkisins hefur verið að lækka allnokkuð  í marsmánuði. Álagið til fimm ára sem stóð í um 1.080 punktum í byrjun mánaðarins er komið niður í 892 punkta nú.

Segir í Morgunkorni Greiningar Íslandsbanka að lækkun merkir að fjárfestar telja minni líkur á því að ríkið lendir í greiðslufalli. Lækkunin er í takti við alþjóðlega þróun en skuldatryggingaálag ríkja hefur almennt verið að lækka í mánuðinum.

„Er það talið merki um minni áhættufælni og að bankakreppan hafi hugsanlega snert  botninn fyrr í mánuðinum. Þess má geta að skuldatryggingaálag íslenska ríkisins fór úr tæplega 400 punktum í tæplega 1.500 punkta við hrun bankanna í byrjun október í fyrra."

Þrátt fyrir lækkun síðustu vikna er skuldatryggingaálag íslenska ríkisins enn hátt í samanburði við önnur ríki.

„Ef það er borið saman við skuldatryggingaálag annarra þróaðra ríkja þá er það Írland sem kemst næst hinu íslenska en álag þess stendur nú í 220 punktum. Þar á eftir kemur Grikkland (170), Austurríki (150), Ítalía (144) og Bretland (110). Samkvæmt þessu er ljóst að fjárfestar telja mun meiri líkur á því að íslenska ríkið lendi í greiðslufalli en önnur þróuð ríki. Íslenska ríkið finnur sína líka mun frekar á meðal ríkja Austur- Evrópu og þá þróunarríkja í þessu sambandi en skuldatryggingaálag Úkraínu er í 3.797,  Kasakstan í 1.104 og Lettlands í 917. Skuldatryggingaálag þessara ríkja hefur einnig verið að lækka allnokkuð undanfarið," að því er fram kemur í Morgunkorni.