Viðskipti | mbl | 31.3.2009 | 9:00 | Uppfært 15.12.2009 15:08

Hagstæð vöruskipti í febrúar

Sjávarafurðir voru 42% alls útflutnings fyrstu tvo mánuði ársins.

Í febrúarmánuði voru fluttar út vörur fyrir 32,3 milljarða króna og inn fyrir 26,4 milljarða króna, samkvæmt útreikningum Hagstofunnar. Vöruskiptin í febrúar, reiknuð á fob verðmæti, voru því hagstæð um 5,9 milljarða króna. Í febrúar 2008 voru vöruskiptin óhagstæð um 18,6 milljarða króna á sama gengi.

Fram kemur í tilkynningu Hagstofunnar, að miðað er við meðalgengi á vöruviðskiptavog sé meðalverð erlends gjaldeyris 59,6% hærra mánuðina janúar–febrúar 2009 en sömu mánuði fyrra árs. Í febrúar var meðalverð erlends gjaldeyris 48,2% hærra en í febrúar í fyrra.

Fyrstu tvo mánuðina 2009 voru fluttar út vörur fyrir 65,9 milljarða króna en inn fyrir 59,6 milljarða króna. Afgangur var því á vöruskiptunum við útlönd, reiknað á fob verðmæti, sem nam 6,3 milljörðum en á sama tíma árið áður voru þau óhagstæð um 35,9 milljarða á sama gengi. Vöruskiptajöfnuðurinn var því 42,2 milljörðum króna hagstæðari en á sama tíma árið áður.

Útflutningur
Fyrstu tvo mánuði ársins 2009 var verðmæti vöruútflutnings 4,2 milljörðum eða 6% minna á föstu gengi en á sama tíma árið áður. Sjávarafurðir voru 42% alls útflutnings og var verðmæti þeirra 13,6% minna en á sama tíma árið áður. Útfluttar iðnaðarvörur voru 49% alls útflutnings og var verðmæti þeirra 5,4% minna en á sama tíma árið áður. Mestur samdráttur varð í útflutningi sjávarafurða, aðallega frystra flaka en á móti kom aukning í útflutningi áls og skipa og flugvéla.

Innflutningur
Fyrstu tvo mánuði ársins 2009 var verðmæti vöruinnflutnings 46,5 milljörðum eða 43,8% minna á föstu gengi en á sama tíma árið áður. Mestur varð samdrátturinn í innflutningi á flutningatækjum, aðallega fólksbílum, og í innflutningi á fjárfestingavöru og neysluvöru annarri en mat- og drykkjarvöru.