Valdis Dombrovskis, forsætisráðherra Lettlands. INTS KALNINS

Alþjóðagjaldeyrissjóðurinn (IMF) hefur frestað frekari lánveitingum til Lettlands. Ríkisstjórn landsins staðfesti þetta í gærkvöldi. Ástæðan er sú að IMF vill að lettnesk stjórnvöld skeri meira niður í ríkisrekstrinum en þau hafa náð að gera hingað til.

Stöðugleikaáætlun Lettlands, sem er fjármögnuð með lánum frá IMF, Evrópusambandinu (ESB) og nokkrum þjóðríkjum á að kosta 7,5 milljarða evra, um 1.200 milljarða íslenskra króna. Fyrsta endurskoðun IMF á áætluninni er ekki lokið og mun ekki ljúka fyrr en að markmiðum hennar verður náð. Þangað til verður frekari lánveitingum frestað.

Lettnesk stjórnvöld keppast nú við að skera niður í ríkisútgjöldum til þess að halda áætluninni við og kveða í kútinn þær áhyggjuraddir sem segja að landið muni þurfa að slíta tengingu sinni við evru til að fella gengi gjaldmiðils Letta, latsins, en ESB hefur meðal annars mælt með þeirri leið.

Spár gera nú ráð fyrir því að efnahagur Lettlands muni dragast saman um tólf prósent á þessu ári, sem er mesti samdráttur allra ríkja innan ESB. Fyrri spár, sem voru birtar þegar samkomulag landsins við IMF var gert í desembermánuði, gerðu ráð fyrir um fimm prósent samdrætti.

IMF samþykkti að koma Lettum til hjálpar í lok síðasta árs eftir að minnkandi þjóðartekjur og þjóðnýting annars stærsta banka landsins, Parex-bankans, urðu þess valdandi að stjórnvöld í Lettlandi urðu að leita til alþjóðlegra stofnana eftir neyðarláni. Áætlun IMF fyrir Lettland er hins vegar bundin ákveðnum skilyrðum og eitt þeirra er að landinu takist að skera nægilega mikið niður í ríkisrekstri sínum.