Þrotabú Samsonar eignarhaldsfélags hefur stefnt gamla Kaupþingi vegna 520 milljóna króna innstæðu sem félagið átti hjá bankanum, en Kaupþing taldi sér heimilt að skuldajafna innstæðunni vegna kröfu á hendur þrotabúinu. Þrotabúið hefur jafnframt lýst kröfum í þrotabú Landsbankans í Lúxemborg, vegna 11,5 milljóna evra sem Samson átti þar í formi innstæðna.

MP banka var nýlega falið að ráðstafa eignarhlut þrotabús Samsonar í Novator Properties Ltd. (NP). Eignarhluturinn í NP var metinn á 14,3 milljarða króna í ársreikningi Samsonar. Helgi Birgisson, skiptastjóri þrotabúsins, segir að í ljósi þess hvernig markaðir hafi þróast að undanförnu sé ómögulegt að setja verðmiða á eignarhlutinn, en eignir NP eru aðallega fasteignafélög.

Í skýrslu skiptastjóra segir að söluverð eignarhlutarins í NP sé metið mun lægra en í bókum Samsonar. „Það er ekki loku fyrir það skotið að þrotabúið haldi þessum eignarhlut þangað til öldurnar lægir á mörkuðum,“ segir Helgi.