Alþjóðagjaldeyrissjóðurinn, IMF, hefur í gegnum tíðina verið gagnrýndur fyrir að leggja ríkjum, sem hann veitir aðstoð, línurnar um hvernig þau eigi að haga sínum fjármálum. Nú hafa margir hins vegar áhyggjur af því að sjóðurinn sé of linur við þær ríkisstjórnir, sem hann lánar fé.

Hefur IMF lánað meira en 55 milljarða dala - andvirði um 7.000 milljarða króna til fjölda ríkja í yfirstandandi kreppu. Claudio Loser, fyrrum yfirmaður Vesturlandadeildar IMF, segir að alvarleg hætta sé á því að sjóðurinn setji ríkjunum ekki nægilega ströng skilyrði. Í frétt Bloomberg er haft eftir talsmanni Royal Bank of Scotland að án slíkra skilyrða muni ríkin ekki taka til í opinberum fjármálum sínum, sem hafa muni fæla frá fjárfesta og hægja á efnahagsbata. Meðal ríkja, sem eru talin í mikilli hættu, eru Ungverjaland og Lettland.

Þrátt fyrir aðstoð IMF er ávöxtunarkrafa á ungversk ríkisskuldabréf þreföld á við það sem hún var fyrir ári og lífeyrissjóðir gætu flúið Lettland eftir að matsfyrirtækið Fitch lækkaði lánshæfi ríkisins niður í það sem kallað er drasl-stig.

Fitch segir að um helmingur Austur-Evrópuríkja standi frammi fyrir lækkun á lánshæfi, en lánshæfiseinkunnir muni taka mið af vilja ríkisstjórna til að fara að ráðleggingum IMF.

Ekki eru þó allir sammála um að IMF sé of linur. Sjóðurinn frestaði afhendingu á lánsfé til Úkraínu vegna þess að hann var ósáttur við halla ríkissjóðs þar í landi. Sama gerðist í Lettlandi. Þá var Íslandi skipað að hækka stýrivexti sína í 18%.