Ekki lánað meira til snekkjukaupa
Höfuðstöðvar Singer & Friedlander.
Breska endurskoðunarfélagið Ernst & Young, sem hefur umsjón með bankanum Singer & Friedlander í greiðslustöðvun, hefur ákveðið að stöðva lán sem veita átti viðskiptavinum bankans til snekkjukaupa. Félagið ætlar einnig að standa fyrir uppboði á listaverkum í eigu bankans.
Singer & Friedlander var dótturfélag Kaupþings í Lundúnum en var settur í greiðslustöðvun að kröfu breska fjármálaeftirlitsins í byrjun október. Allir Kaupthing Edge innlánsreikningar, sem stofnaðir höfðu verið hjá Singer & Friedlander voru fluttir til hollenska bankans ING.
Fram kom í vetur, að um 400 viðskiptavinir einkabankaþjónustu Singer & Friedlander höfðu fengið jafnvirði 1,2 milljarða punda að láni. Stærstur hlutinn, eða 33%, var vegna fasteignakaupa á Bretlandi en fjórðungurinn, um 300 milljónir punda, var vegna kaupa á einkaþotum og snekkjum.
Nú segir fréttavefur Guardian, að Ernst & Young hafi ákveðið að stöðva fyrirhuguð 90 milljóna punda lán, jafnvirði 17 milljarða króna, til snekkjubygginga. Fram kemur í skýrslu félagsins, að það hafi verið metið svo að óvissa ríkti um, að hægt yrði að endurheimta féð þótt snekkjurnar yrðu fullsmíðaðar.
Í skýrslunni kemur einnig fram, að viðskiptavinir Singer & Friedlander eigi við ýmsa aðra erfiðleika að etja. Um 400 milljónir punda voru lánaðar til fasteignakaupa áður en fjármálamarkaðurinn hrundi og tilsjónarmennirnir segja að ólíklegt sé að það takist að endurfjármagna þau lán í núverandi markaðsumhverfi. Þá hafi lánin verið veitt þegar verð á fasteignamarkaði var hámarki en nú sé ljóst að veð nægi ekki fyrir lánunum.
Kostnaður E&Y vegna umsjónarinnar með bankanum námu 15,9 milljónum punda auk virðisaukaskatts, jafnvirði 3 milljarða króna, á því hálfa ári sem liðið er frá því verkefnið hófst. Ætlar endurskoðunarfélagið að óska eftir því, að greiðslustöðvunartímabilið verði framlengt í þrjú ár þannig að því ljúki 7. október 2012 vegna þess hve flókið uppgjör búsins sé.
Til stendur, að greiða kröfuhöfum Singer & Friedlander út 10% af kröfum þeirra í júní eða júlí og að á endanum fái kröfuhafar um helming krafna sinna greiddar.
Þá hafa tilsjónarmennirnir beðið uppboðshúsið Christies að halda uppboð á málverkum í eigum bankans í maí. Einnig stendur til að selja ýmsa muni svo sem tölvubúnað og húsgögn á uppboði.
