Viðskiptahalli íslenska þjóðarbúsins nam 49,4 milljörðum króna á fyrsta ársfjórðungi sem er talsvert minni halli en á síðustu fjórðungum á undan. Rúmlega 14 milljarða afgangur var í vöru- og þjónustuviðskiptum við útlönd en rétt yfir 59 milljarða kr. halli þáttatekna og 2,6 milljarða kr. halli á þjónustuviðskiptum skýrir óhagstæðan viðskiptajöfnuð.

Halla á þáttatekjum á fyrsta ársfjórðungi má að langmestu leyti rekja til hárra vaxtagjalda innlendra aðila erlendis. Sá hluti þessara vaxtagjalda sem rekja má til gömlu bankanna eru ógreidd og mynda því ekki raunverulegt greiðsluflæði frá landinu. 

Fram kemur á vef Seðlabanka Íslands að greiðslur í vanskilum komi til hækkunar á skammtímaskuldum þar sem þær séu raunverulega fjármagnaðar af skuldareigendum, það mælist sem innstreymi fjár í fjármagnsjöfnuði. Hreint fjárinnstreymi mældist 122,8 milljarðar kr. á fyrsta ársfjórðungi sem skýrist m.a. af áðurnefndri fjármögnun á vanskilum.

Hrein staða við útlönd hafi verið neikvæð um 4.580 milljarða kr. í lok fyrsta ársfjórðungs og réttist af um rúma 131 milljarð kr. frá síðasta fjórðungi.
Helsta skýringin á þessari þróun milli ársfjórðunga sé lækkun á
skammtímaskuldum Seðlabankans en gengisþróun hefur einnig
einhver áhrif.

Erlendar eignir námu 8.479 milljörðum kr. í lok ársfjórðungsins en skuldir 13.059 milljarðar kr. Vert sé að geta þess að inni í tölum um erlendar skuldir sé ennþá eignir og skuldir viðskiptabankanna þriggja sem nú séu í greiðslustöðvun. Fjármögnun vanskila hefur líka haft áhrif til hækkunar á skammtímaskuldum.