„Ég get staðfest að það fór fram hér húsleit, annars vegar vegna rannsóknar ríkislögreglustjóra á félögum í eigu Hannesar Smárasonar og hins vegar vegna athugunar sérstaks saksóknara á Q Iceland Finance ehf.,“ segir Gunnar Sturluson, framkvæmdastjóri Logos lögmannsstofu.

Húsleitin vegna Q Iceland Finance ehf. er vegna meintrar markaðsmisnotkunar og hugsanlegra auðgunarbrota í tengslum við kaup sjeiksins frá Katar á hlutabréfum í Kaupþingi. Húsleit ríkislögreglustjóra er vegna meintra brota Hannesar, en Gunnar hefur verið lögfræðingur Hannesar um árabil og er enn. Leitað var í vefhýsingunni hjá Logos í gær og var þar lagt hald á tölvupósta. Gunnar vildi ekki tjá sig um magn gagna sem lagt var hald á eða húsleitina að öðru leyti.

Hannes á 100% hlut í FI fjárfestingum ehf., sem hét Fjárfestingarfélagið Primus til 28. nóvember 2008. Gunnar Sturluson var framkvæmdastjóri og stjórnarformaður þess félags til 28. nóvember í fyrra.

FI á fjögur dótturfélög, þrjú sem eru í 100% eigu félagsins og EO eignarhaldsfélag sem er í 86% eigu FI. EO eignarhaldsfélag hét áður Eignarhaldsfélagið Oddaflug. Það félag átti 100% í Oddaflugi B.V. frá Hollandi sem var um tíma stærsti eigandi FL Group. Gunnar var stjórnarformaður þess félags þar til 28. nóvember sl., en þar voru bréf Hannesar í FL Group geymd. Gunnar sat einnig í stjórn Sveips ehf. sem var í eigu Primus. | 5