„Segir endurskoðendur hafa verndað stjórn FL"

„Grunur minn um meint umboðssvik reyndist á rökum reistur. Bæði lögmenn og endurskoðendur FL Group reyndu að dylja þessar gjörðir,“ segir Vilhjálmur Bjarnason, hluthafi í FL Group og framkvæmdastjóri Samtaka fjárfesta, um rannsókn efnahagsbrotadeildar ríkislögreglustjóra á aðkomu FL Group að kaupunum á danska flugfélaginu Sterling. Verið er að rannsaka annars vegar hvort viðskiptin hafi brotið í bága við hlutafélagalög og hins vegar hvort kaup og sala á Sterling milli tengdra aðila séu mögulega umboðssvik.

Morgunblaðið skýrði frá því á fimmtudag að meðal þeirra gagna sem vísað hafi verið til efnahagsbrotadeildarinnar séu gögn sem staðfesta að Hannes Smárason, þáverandi stjórnarformaður FL Group, hafi látið millifæra um þrjá milljarða króna inn á reikning í Kaupþingi í Lúxemborg vorið 2005. Þeir fjármunir hafi síðan verið notaðir af Fons, í eigu Pálma Haraldssonar, til að kaupa Sterling. FL Group var á þeim tíma almenningshlutafélag.

Vilhjálmur bar upp fyrirspurn um þessar millifærslur á hluthafafundi í FL Group haustið 2005 og á aðalfundi félagsins í mars 2006.

Vilhjálmur telur sennilegt að hluthafar í FL Group muni geta leitað réttar síns gagnvart þeim einstaklingum sem framkvæmdu þennan gjörning. „Ég tel að svo sé, sérstaklega ef það kemur í ljós að Hannes [Smárason], Pálmi [Haraldsson] og Jón Ásgeir [Jóhannesson] hafi með einhverjum hætti skipt á milli sín hagnaði af Sterling-viðskiptunum. Þá er þetta alveg borðliggjandi. Það voru þeir persónulega sem framkvæmdu þessar gjörðir.“

Voru að vernda stjórnina

Á síðari fundinum svaraði Jón S. Helgason, endurskoðandi frá KPMG sem skrifaði upp á ársreikninga FL Group, því til að stórar útborganir af reikningum félagsins hefðu verið kannaðar en að ekki hefðu fundist neinar greiðslur á þeim tíma sem Vilhjálmur spurði um. Heimildir Morgunblaðsins herma að Jón hafi spurst fyrir um umrædda millifærslu hjá Kaupþingi í Lúxemborg og um hvort upphæðin sem færð var á milli hefði verið hreyfð. Aðspurður vildi Jón hvorki játa því né neita að hann hefði haft vitneskju um millifærslur Hannesar.

Vilhjálmur segist ekki vera hissa á þeim viðbrögðum. „Þeir [endurskoðendur FL Group] voru að vernda stjórn félagsins. Þeir voru ekki að gæta hagsmuna hluthafa. Það voru hins vegar hluthafar sem kusu þá til að gæta hagsmuna sinna, meðal annars gagnvart stjórn.“