Arnór Sighvatsson, aðstoðarbankastjóri Seðlabankans, og Svein Harald Øygard, seðlabankastjóri. mbl.is/Golli

Tveir nefndarmenn peningastefnunefndar Seðlabankans vildu halda stýrivöxtum óbreyttum þegar síðasta stýrivaxtaákvörðun nefndarinnar var tekin hinn 4. júní síðastliðinn, en það var á endanum niðurstaða meirihluta nefndarinnar að lækka stýrivexti um eina prósentu, niður í 12%. Þetta kemur fram í fundargerð peningastefnunefndar sem birt var í dag.  

Nefndarmenn töldu mikilvægt að aukin áhersla yrði á að framfylgja gjaldeyrishöftunum. Einn nefndarmaður taldi að auknir möguleikar á að fara í kring um gjaldeyrishöftin væri ein helsta ástæða lækkunar gengis krónunnar í maí.

Snemmbúin losun hafta gæti stefnt stöðugleika krónu í tvísýnu
Nefndin skoðaði einnig forsendur þess að losa gjaldeyrishöftin og taldi að yrði það gert of snemma gæti það stefnt stöðugleika krónunnar í tvísýnu. Samþykkt aðhaldsaðgerða í opinberum fjármálum til langs tíma og endurskipulagning bankakerfisins myndu styðja við uppbyggingu efnahagslífsins og draga úr hættu á verulegri gengislækkun í kjölfar afnáms gjaldeyrishaftanna.

Nefndarmenn ræddu mögulega vaxtaákvörðun á bilinu frá óbreyttum stýrivöxtum til lækkunar um 2 prósentur og lækkunar innlánsvaxta um allt að 1,25 prósentur.

Með hliðsjón af umræðunni lagði Svein Harald Øygard seðlabankastjóri til að stýrivextir yrðu lækkaðir um 1 prósentu í 12%.  Þrír nefndarmenn greiddu atkvæði með tillögu seðlabankastjórans. Hinir tveir nefndarmennirnir greiddu atkvæði með því að halda stýrivöxtum óbreyttum. Allir nefndarmenn voru sammála um að innlánsvextir skyldu verða óbreyttir, eða 9,5%.

Í peningastefnunefnd sitja auk Øygards, Arnór Sighvatsson, aðstoðarbankastjóri, Þórarinn G. Pétursson, aðalhagfræðingur og prófessorarnir Anne Sibert og Gylfi Zoëga.