Margeir Pétursson, stjórnarformaður MP banka. Kristinn Ingvarsson

MP banki leggur áherslu á í yfirlýsingu til mbl.is að öll starfsemi bankans og útibúa fullnægi öllum kröfum laga og reglna. Mbl.is sagði frá því fyrr í dag að Fjármálaeftirlitið í Litháen hafi vísað máli MP banka til íslenska Fjármálaeftirlitins.

„Á fyrri hluta ársins gerði Fjármálaeftirlitið í Litháen ítarlega úttekt á útibúi bankans í Litháen. Á meðal niðurstaða úttektarinnar voru tvær athugasemdir. Annars vegar að eitt ákvæði í viðskiptaskilmálum útibúsins  sem varðar sönnunarbyrði á pöntunum, kunni að vera í andstöðu við litháísk lög,“ segir í yfirlýsingu MP Banka.

„Hins vegar að bankinn hafi ekki fullnægt öllum þeim kröfum sem gerðar eru til vörslu gagna, t.d. voru einstaka viðskiptabeiðnir sem bárust í síma ekki áritaðar um að þær hafi borist í síma.   Brugðist hefur verið við athugasemdum eftirlitsins í Litháen. 

Athugasemdir Fjármálaeftirlitsins í Litháen eru sjálfkrafa sendar til Fjármálaeftirlitsins á Íslandi sem annast eftirlit með MP Banka.  MP Banki telur sig standa mjög vel að rekstri útibúsins í Litháen og mun að sjálfsögðu breyta skilmálum sínum og starfsreglum til samræmis við þarlend lög, eftir því sem við á.
 
Það er ekki rétt sem fram kemur í frétt mbl.is að að MP Banki hafi brotið lið í almennum samningi um fjármálastarfsemi í landinu. Ekkert slíkt kemur fram í tilkynningu Fjármálaeftirlitsins í Litháen. Virðist sá þáttur tilkynningarinnar um að ákvæði í viðskiptasamningum MP Banka kunni að brjóta í bága við litháensk lög hafi verið misskilin.  MP Banki leggur áherslu á að öll starfsemi bankans og útibúa fullnægi öllum kröfum laga og reglna.“