Lettland stendur frammi fyrir því að fá ekki 600 milljón evra, 108 milljarða króna, lán ef ríkið gengur ekki frá samkomulagi við Alþjóða gjaldeyrissjóðinn á næstu dögum. Um er að ræða alþjóðlegan björgunarpakka til Letta en efnahagur landsins er afar bágborinn.

„Lettland og Alþjóða gjaldeyrissjóðurinn verða að skrifa undir samkomulagið fyrir föstudag. Að öðrum kosti verður ekkert af fyrirhugaðri innspýtingu frá alþjóðlegum lánveitendum," segir Liga Krapane, talsmaður forsætisráðherra Lettlands, Valdis Dombrovskis.

Dombrovskis hefur setið við samningaborðið með sendinefnd IMF frá því á mánudag þar sem reynt er að semja um möguleika ríkisins til þess að draga úr útgöldum en spáð er 18% efnahagssamdrætti í Lettlandi í ár.

Að sögn Dombrovskis hefur IMF sett ný skilyrði fyrir lánveitingunni og mun sjóðurinn ekki afhenda fjármunina fyrr en Lettar fari að þeim. Þetta er ekki í fyrsta skiptið sem IMF frestar því að greiða lán til Letta. Krest sjóðurinn þess að stjórnvöld geri meira til þess að draga úr fjárlagahallanum en áætlað er. Verulega hefur verið dregið úr allri opinberri þjónustu í landinu að undanförnu til þess að mæta kröfum IMF. Allt hefur verið í kaldakoli í efnahag landsins frá því í lok síðasta árs og í desember fékk Lettland lánsloforð upp á 7,5 milljarða evra, 1.351 milljarð króna, frá IMF, ESB, Svíum auk fleiri ríkja.