Halldór J. Kristjánsson, fyrrverandi bankastjóri Landsbankans, átti frumkvæði að því að biðja um lán hjá Búnaðarbankanum fyrir Samson, eignarhaldsfélag Björgólfsfeðga og Magnúsar Þorsteinssonar, í mars 2003, samkvæmt heimildum Morgunblaðsins. Umrætt lán var notað til að greiða 30% prósent af þeim 11,2 milljörðum króna sem Samson greiddi fyrir 45,8% kjölfestuhlut í Landsbankanum.

Fór Halldór J. þess á leit við Búnaðarbankann að lánið yrði veitt á sömu kjörum og Landsbankinn hefði lánað Eglu, sem myndaði S-hópinn svokallaða, fyrir kaupum á Búnaðarbankanum hinn 31. janúar 2003, meðan Landsbankinn var enn undir stjórn ríkisins. Halldór segir aðkomu sína að láninu ekki hafa verið óeðlilega.