Afnema á öll höft af innstreymi erlends gjaldeyris til Íslands á tiltölulega skömmum tíma. Hins vegar verður notkun á krónunni í alþjóðaviðskiptum háð takmörkunum áfram. Þetta er meðal þess sem kynnt var á blaðamannafundi hjá Seðlabankanum þar sem afnmám gjaldeyrishafta var kynnt.

Eign útlendinga í krónum dregst saman

Samkvæmt tölum Seðlabanka Íslands hefur verð eignarhluta útlendinga í íslenskum krónum lækkað úr u.þ.b. 680 ma.kr. í árslok 2008 í u.þ.b. 610 ma.kr. í lok júlí.

Almennt virðist sem dregið hafi úr spennunni í kerfinu undanfarna mánuði og munurinn á gengi íslensku krónunnar á innlendum gjaldeyrismarkaði og aflandsmörkuðunum hafi minnkað.

Langtímastöður hafa aukist lítilega, meðan skammtímastöður hafa farið úr u.þ.b. 330 ma.kr. í 260 ma.kr.

Þrátt fyrir að einhver óvissa sé um þessar tölur benda þær líklega til þess að stöður erlendra aðila í íslenskum krónum hafi lækkað. Erlendir aðilar virðast vera tiltölulega sáttir við að eiga um sinn eignir í íslenskum krónum í formi ríkisskuldabréfa, skuldabréfa Íbúðalánasjóðs og innlána Seðlabankans og viðskiptabanka. Takmarkaður áhugi hefur verið á því að breyta úr slíkum stöðum í íslenskum krónum yfir í langtímastöður í evrum með þeim úrræðum vegna „óþolinmóðra fjárfesta“ sem kynnt voru í maí, að því er segir í tilkynningu frá Seðlabankanum.

Í heildina er talið að erlendir aðilar sem eiga a.m.k. helming krónustöðu erlendra aðila, t.d. langtímaskuldabréf Íbúðalánasjóðs, telji hagstætt að halda stöðum sínum til lengri tíma. Í maí 2009 mat Seðlabankinn það svo að u.þ.b. 250–300 ma. kr. væru í eigu ,,óþolinmóðra erlendra fjárfesta” sem þyrfti annaðhvort að veita hvata til að halda kyrru fyrir, leysa af hólmi með því að aðrir innlendir eða erlendir fjárfestar fjárfestu í eignum í íslenskum krónum (sem heppilegast væri) eða að beita áfram höftum á fyrstu áföngum áætlunar um afnám gjaldeyrishaftanna.

Tilkynning á vef Seðlabanka Íslands