Evrusvæðið réttir úr kútnum
E
Efnahagur landanna 16 sem nota evru sem gjaldmiðil dróst saman um aðeins 0,1% á öðrum ársfjórðungi á sama tíma og Þýskaland og Frakkland höfðu sig upp úr samdrætti. Tölurnar sem eru bráðabirgðaáætlanir, hafa vakið upp vonir um að þessu tvö stóru hagkerfi evrusvæðisins muni hífa hin ríkin upp úr versta samdráttarskeiði sem gengið hefur yfir svæðið frá því 1945. Sérfræðingar segja þó að taka skuli tölunum með varúð.
Aðalhagfræðingur seðlabanka Evrópu, Jürgen Stark, segir að vera megi að hagvöxtur á svæðinu komi fyrr en vænst hafi verið. „Það eru vissulega vísbendingar um jafnvægi í efnahagslífinu í augnablikinu,“ segir hann í viðtali við Börsen Zeitung, en bætir við að vöxturinn sé þó aðallega knúinn áfram af þeim aðgerðum ríkisvaldsins sem gripið var til í því skyni að örva efnahagslífið og að um þessar mundir hafi stóru vöruhúsin verið að birgja sig upp á nýtt.
„Séð í því ljósi getum við ekki treyst á varanlegan viðsnúning í efnahagsvextinum,“ segir hann.
Sérfræðingar rýna nú nánar í tölurnar til að finna út í hverju munurinn sé fólginn á óvæntum vexti Þýskalands og Frakklands og spám um áframhaldandi samdrátt á öðrum ársfjórðungi. Framkvæmdastjórn ESB og Alþjóða gjaldeyrissjóðurinn höfðu gert ráð fyrir hóflegum viðsnúningi á næsta ári.
Hagvaxtartölur bæði Þýskalands, stærsta hagkerfis álfunnar, og Frakklands upp á 0,3% komu því flestum í opna skjöldu, en ekki hafði verið gert ráð fyrir að þau brytust út úr samdráttarskeiðinu svo skjótt.
Síðustu tölur Eurostat fyrir evrusvæðið í heild sýna hins vegar samdrátt fimmta ársfjórðunginn í röð, en horfurnar eru þó mun betri en met samdráttur landsframleiðslunnar upp á 2,5% á fyrsta ársfjórðungi.
Sérfræðingar í Frakklandi sem lesið hafa í tölurnar þarí landi segja þó horfurnar viðkvæmar. Hagfræðingurinn Costa Brunner sem skoðað hefur tölurnar frá Þýskalandi segir svipaða sögu og telur líkur á að bakslag geti orðið á næsta ári. Engu að síður komu tölur hagfræðingum á óvart en í skoðanakönnun sem Dow Jones Newswires gerði, höfðu þeir spáð 0,4% samdrætti.
Efnahagur 27 ríkjanna innan Evrópusambandsins dróst saman um 0,3% á öðrum ársfjórðungi, þar sem munaði mest um samdráttinn í Bretlandi upp á 0,8%. Þetta er þó umtalsvert betri niðurstaða en á fyrsta ársfjórðungi þegar samdrátturinn nam 2,4%,
