Reuters

Eftir Bjarna Ólafsson bjarni@mbl.is

Árni Tómasson, formaður skilanefndar Glitnis, segir nefndina hafa sett fram þá kröfu í máli Fons og annarra sambærilegra félaga að geta gert þær rannsóknir sem skilanefndin telur nauðsynlegar. „Það er ekki endilega vegna þess að við búumst við því að finna eitthvað vafasamt, heldur viljum við hafa þennan möguleika. Rannsóknirnar gætu t.d. miðað að því hvert lánsféð rann.“ Fons var eignarhaldsfélag að stærstum hluta í eigu Pálma Haraldssonar.

Eins og fram hefur komið í Morgunblaðinu voru veðkröfur í Fons um 15% af heildarkröfum í búið. Í þrotabúi Samson er þetta hlutfall 43,8% og hjá Baugi 39%. Reyndar eru veðin, sem fyrir veðkröfunum standa, misgóð en í mörgum tilfellum voru lán veitt með veðum í hlutabréfum í fyrirtækjum sem nú eru gjaldþrota.

Heildarkröfur í þrotabú Fons nema 34,5 milljörðum króna og eru kröfur skilanefndar Glitnis þar af tæpir 24 milljarðar króna. Aðeins tæpar 570 milljónir af kröfum Glitnis eru veðkröfur og hefur skiptastjóri þrotabús Fons sagt að alls sé óvíst hvað fáist upp í almennar kröfur. „Þetta lága hlutfall veðkrafna af kröfum Glitnis í Fons er ástæðan fyrir málshöfðuninni,“ segir Vilhjálmur Bjarnason, sem hefur lagt fram kröfu fyrir Héraðsdómi um að fá upplýsingar um tilkomu lánanna, eins og greint hefur verið frá í Morgunblaðinu.

Samkvæmt heimildum Morgunblaðsins er þrotabú Fons ekki einstakt hvað varðar lágt hlutfall veðkrafna. Einn heimildarmaður Morgunblaðsins í bankakerfinu segir sorglega algengt að slæm veð eða jafnvel engin hafi verið fyrir lánum til eignarhaldsfélaga. Staðan sé hins vegar betri hvað varði lán til rekstrarfélaga. Ekki náðist í Pálma Haraldsson í gær.