Northern Rock fær „íslenska“ meðferð
Innstæðueigendur hjá Northern Rock í Kingston, Surrey, sunnanverðu Englandi, stóðu í biðröðum til að taka út peningana sína. Reuters
Breska fjármálaráðneytið virðist ætla að fara „íslensku leiðina“ í endurskipulagningu á Northern Rock bankanum sem varð fyrsta fórnarlamb lánsfjárkreppunnar í Bretlandi, að því að fram kemur á vef Sky-sjónvarpsins. Leiðin er að skipta bankanum í „vondan“ banka og „góðan“ banka.
Þar kemur fram að fjármálaráðuneytið og Northern Rock séu í þann veginn að ná samkomulagi um það hvernig málum verður hagað eftir þessa tvískiptingu. Samkvæmt áætluninni verða búnar til tvær bankastjórnir og jafnframt mun UK Financial Investment, sú stofnun fjármálaráðuneytisins sem fer með hlut skattborgaranna í bankageiranum, eiga fulltrúa í hvorum bankanum.
Ríkisstjórnin tilkynnti fyrr á árinu að hún hygðist aðskilja lánastarfsemi bankans, þ.e. skilja frá eldri lán og slæmar skuldir. „Góði bankinn“, kallaður BankCo, héldi verðmætustu hlutum Norhern Rocks, viðskiptabankastarfseminni með innlánshlutanum og útibúanetinu. „Vondi bankinn“, kallaður AssetCo, heldur eftir milljörðum punda af slæmum eða vafasömum eignum.
Gagnrýnendur, einkanlega samtök húsnæðislánastofnanna, telja að þetta fyrirkomulag veiti Northern Rock óeðlilegt forskot á keppinauta sína, og nýja fyrirkomulagið mun jafnframt stuðla að því að unnt verði að selja BankCo þegar á næsta ári.
Fjármálaráðuneytið mun vilja ýta undir samkeppni á viðskiptabankasviðinu, og Sky segir því líklegast að bankinn verði seldur til nýliða á þessum markaði.
Megin hindrunin fyrir endurskipulagningu Northern Rock er framkvæmdastjórn Evrópusambandsins, sem verður að veita samþykki fyrir ríkisaðstoðinni sem bankinn fær frá stjórnvöldum. Gert hefur verið ráð fyrir því að nýja samkomulagið verði kynnt fyrir 6 til 8 vikur en dragist að fá samþykki ESB gætu þessar tímasetningar raskast.
Northern Rock er með bækistöðvar sínar í Newcastle, var þjóðnýttur í byrjun árs 2008 og þannig fyrsta stóra fórnarlamb lánsfjárkreppunnar í Bretlandi. Skelfing greip um sig meðal innstæðueigenda sem þyrptust að útibúum hans svo að biðraðir mynduðust þegar fólk vildi taka út fjármuni sína.
Bankinn hafði þegar fengið ríkisstuðning árið áður og milljarða punda í viðbót var veitt til bankans til að koma í veg fyrir fall hans - bankinn skuldar ríkinu enn tæpa 11 milljarða punda, um 2230 milljarða króna.
