Ásmundur Stefánsson, bankastjóri Nýja Landsbankans, segir að stærð bankans, fjölbreytni útlánasafns og eignarhlutur ríkisins muni styrkja hann til erlendrar lántöku. „Landsbankinn verður eini stóri íslenski bankinn og á allt undir fólki og fyrirtækjum á Íslandi,“ sagði Ásmundur þegar hann ávarpaði aðalfund Samtaka fiskvinnslustöðva á Grand Hóteli í dag.   

Ásmundur sagði að skuldabréf í erlendri mynt í skuldauppgjöri bankans gæfu möguleika á því að viðhalda hluta lána í erlendri mynt.

„Ég er ekki þeirrar skoðunar að skortur á erlendu eignarhaldi muni veikja stöðu okkar erlendis,“ sagði Ásmundur og var að vísa til möguleika bankans til að afla sér lánsfjár á erlendum mörkuðum.

Ásmundur sagði að Landsbankinn hefði margvísleg úrræði handa fyrirtækjum. Um væri að ræða breytingar á skilmálum lána, skilyrtar afskriftir lána á móti nýju hlutafé, yfirtaka á eignarhaldi og rekstri. Hann sagði að Landsbankinn hefði jafnframt leitt lækkun útlánsvaxta.