Fyrrum mágur Tchenguiz stefnir Kaupþingi
Robert Tchenguiz. Reuters
Fyrrum mágur kaupsýslumannsins Roberts Tchenguiz hefur að sögn breska blaðsins Observer stefnt skilanefnd Kaupþings og krefst þess að fá í hendur hluta af hagnaði vegna sölu á hlutabréfum í bresku verslunarkeðjunni Somerfield.
Deilur hafa verið um hluta af söluandvirði hlutabréfanna í Somerfield en hluturinn var seldur í febrúar á þessu ári fyrir 1,6 milljarð breskra punda. Kaupþing fjármagnaði kaup Tchenguiz á hlutabréfunum fyrir fjórum árum og skilanefnd bankans gekk að hlutnum í veðkalli sl. haust.
Breska sunnudagsblaðið Observer segir, að suður-afríski kaupsýslumaðurinn Vivian Imerman hafi nú höfðað mál gegn skilanefnd Kaupþings og segir hana neita að viðurkenna að fyrirtæki hans hafi fjármagnað kaup á hluta af Somerfield-bréfunum. Vísar Imerman m.a. til tölvupósts frá lögmönnum Kaupþings þar sem segir að engin gögn séu um að fyrirtæki Imermans hafi tekið þátt í viðskiptunum. Deilan snýst um 5 milljónir punda, jafnvirði um milljarðs íslenskra króna.
Blaðið segir, að þeir Imerman og Tchenguiz deili nú opinberlega og fyrir dómstólum í kjölfar skilnaðar Imermans og Lisu, systur Tchenguiz. Áður voru þeir viðskiptafélagar.
Deilur skilanefndar Kaupþings og Tchenguiz má rekja til þess að bankinn krafðist þess að Tchenguiz greiddi 645 milljóna punda yfirdrátt sem félag í hans eigu hafði hjá bankanum. Í kjölfarið gekk skilanefndin að veðum sem bankinn hafði í hlutabréfum Somerfield og kráakeðjunni Mitchells & Butlers. Fjárfestingarfélag Tchenguiz, Tchenguiz Discretionary Trust, átti hlutinn í Somerfield ásamt Apax Partners og Barclays Capital.
Þegar skilanefnd Kaupþings yfirtók aflandsfélagið Oscatello Investments, sem talið var ráða yfir hlutabréfunum í Somerfield kom í ljós að þau höfðu verið færð til annars fjárfestingarfélags, sem tengdist Tchenguiz, gegn skuldaviðurkenningu og loforðs um endurgreiðslu eftir 30 ár.
Að sögn Observer hefur fé, sem talið er vera hluti af söluverði Somerfield-bréfanna, verið fryst á Bresku Jómfrúreyjum. Hafi stjórnarmönnum Tchenguiz Discretionary Trust verið stefnt en þó ekki Tchenguiz og fjárfestingarfélagi hans, R20.
