Lánshæfismat Landsvirkjunar lækkað
Hefur neikvæð áhrif á aðgang að nýju lánsfé
Landsvirkjun fékk fyrst lánshæfiseinkunn árið 1998 og hefur ávalt haft sömu einkunn og ríkissjóður hjá Moody's, að því er segir í tilkynningu. Í lánssamningum Landsvirkjunar eru engin ákvæði sem kalla á uppsögn eða breytingar þó að lánshæfismat lækki. Breytingin nú hefur því engin áhrif á vaxtakjör á eldri lánum fyrirtækisins. Breytingin hefur hins vegar, að öllu öðru óbreyttu, neikvæð áhrif á aðgengi Landsvirkjunar að nýju lánsfjármagni á ásættanlegum kjörum, samkvæmt upplýsingum frá Landsvirkjun.
Laust fé Landsvirkjunar um 340 milljónir dala
Á vef Landsvirkjunar kemur fram í frétt frá 28. október sl. að laust fé fyrirtækisins nemi um 340 milljónum dala, jafnvirði um 40 milljarða króna, sem dugi til að byggja tæpar tvær Búðarhálsvirkjanir. Þá sé eigið fé Landsvirkjunar tæplega 180 milljarðar króna og eiginfjárhlutfallið 31,2%.
Þá kemur fram að erlendir lánsfjármarkaðir séu lokaðir íslenskum aðilum vegna sérstakra aðstæðna sem snúi að íslenska ríkinu. „Á meðan ástandið er með þeim hætti er óábyrgt af hálfu Landsvirkjunar að ráðast í nýjar framkvæmdir nema fyrirtækið hafi fjármagnað þær að fullu með nýjum langtímalánum. Að því er unnið,“ segir á vef Landsvirkjunar.
Landsvirkjun þarf að endurfjármagna sig 2012
Friðrik Sophusson, fyrrverandi forstjóri Landsvirkjunar, sagði í samtali við Morgunblaðið í október að á
meðan Landsvirkjun sé ekki að fara í ný verkefni og þurfi ekki á lánum
að halda hafi lánshæfið enga þýðingu. „Í þeim lánasamningum sem eru í
gildi er ekkert sem gerir það að verkum að þeir verði uppsegjanlegir þó
að lánshæfiseinkunn fyrirtækisins sé slæm þessa stundina. Það hefur
hins vegar þýðingu að lánshæfiseinkunn ríkisins batni því þá mun hún
væntanlega batna hjá Landsvirkjun áður en fyrirtækið þarf að
endurfjármagna sig á árinu 2012,“ segir Friðrik.
