Skuldabréf Eikar á athugunarlista
Kauphöll Íslands. Reuters
Eru forsvarsmenn Eikar mjög ósáttir við þessa ákvörðun bankans og telja að hann sé með þessu að brjóta eigin verklagsreglur um lausnir á vanda skuldugra fyrirtækja. Telja Eikarmenn félagið standast skilyrði reglna um jákvætt sjóðsstreymi og ná megi samningum um afborganir skuldanna.
Í tilkynningu Eikar til kauphallarinnar í gær er bent á að sjóðsstreymi félagsins standi undir öllum vaxtagreiðslum þessa árs og næstu ára. Bókfært eigið fé Eikar hafi verið yfir 2 milljarðar króna í lok júní sl.
Eik fasteignafélag á og rekur fjölmargar fasteignir á höfuðborgarsvæðinu og landsbyggðinni, m.a. allt húsnæði Húsasmiðjunnar. Eignasafn félagsins var um mitt ár metið á 19,7 milljarða króna. Á sama tíma námu vaxtaberandi skuldir 17,4 milljörðum og þar af eru 11,8 milljarðar hjá Kaupþingi. Frá því að íslensku bankarnir voru teknir yfir af FME hefur Eik átt í viðræðum við lánardrottna sína um fjárhagsstöðu félagsins. Það er að stórum hluta í eigu félagsins Eik Properties, á vegum gamla Saxbyggs, og Íslandsbanka. Í upphafi var Eik í eigu Lýsingar.
