Mervyn King. Reuters

Bankastjóri Englandsbanka upplýsti í yfirheyrslum þingnefndar í morgun, að bankinn hefði í október og nóvember á síðasta ári lánað Royal Bank of Scotland og HBOS samtals 61,6 milljarða punda, jafnvirði 12.500 milljarða króna, í neyðarlán til að halda bönkunum gangandi.

Þetta er í fyrsta skipti, sem upplýsingar koma fram um þá aðstoð, sem stærstu bankar Bretlandseyja fengu þegar fjármálakreppan skall á af fullum þunga. 

Mervyn King, bankastjóri Englandsbanka, sagði að neyðarlánin hefðu verið veitt til að koma í veg fyrir að vantraust á bankakerfið breiddist út um allt fjármálakerfið. Hann bætti við, að bankarnir hefðu endurgreitt lánin að fullu í janúar. 

Í yfirlýsingu, sem Englandsbanki sendi frá sér í morgun, segir að fjallað hafi verið um hvort það væri í þágu almennings að gera fyrr grein fyrir þessum lánveitingum en niðurstaðan hafi verið að bíða með það þar til þörf fyrir leynd hefði ekki lengur verið fyrir hendi að mati bankans.

King sagði, að Englandsbanki hefði með lánveitingunum verið að axla hlutverk sitt sem lánveitandi til þrautavara.

Royal Bank of Scotland hefur síðan fengið fjárhagsaðstoð frá breska ríkinu samkvæmt áætlun sem gerð var í því skyni. Þá hefur Lloyds Banking Group, sem yfirtók HBOS, boðað hlutafjárútboð meðal hluthafa til að auka eigið fé.  

King var spurður í morgun hvort hann teldi hættu á, að lánshæfiseinkunn breska ríkisins verði lækkuð. Hann svaraði, að ekki væri yfirvofandi hætta á slíku en því lengri tíma, sem taki að leggja fram trúverðuga aðgerðaráætlun um að draga úr hallarekstri ríkisins, þeim mun meiri verði sú hætta.