50-65% endurheimtahlutfall
Árni Sæberg
Áætlað er að 50–65% endurheimtist af virði eigna Frjálsa fjárfestingarbankans að því er kom fram á fyrsta kröfuhafafundi bankans 19. nóvember síðastliðinn. Helstu þættir sem hafa áhrif á endurheimturnar eru þróun á fasteignamarkaði, gengi gjaldmiðla, hagvöxtur og atvinnu- og launaþróun.
Héraðsdómur Reykjavíkur féllst í júní á kröfu um að Frjálsa fjárfestingarbankinn yrði tekinn til slita þegar eigið fé bankans var uppurið.
Í tilkynningu frá slitastjórn bankans segir að markaðsaðstæður séu óhagstæðar til eignasölu sem stendur og því sé farsælast að reka bankann áfram til að hámarka virði eigna hans, m.a. með útleigu á eignum. Slitastjórn telji raunhæft að kanna möguleika á nauðasamningi þar sem hann muni að líkindum hafa í för með sér hagstæðari niðurstöðu fyrir kröfuhafa heldur en gjaldþrotaskipti. Uppgjör kunni að taka nokkur ár.
Lýstar kröfur í bú bankans námu tæpum 100 milljörðum króna, 37 kröfur voru samþykktar í heild eða breyttar að fjárhæð rúmir 93 milljarðar króna samkvæmt kröfuskránni, 110 kröfum var hafnað og 26 hafnað að svo stöddu. Samþykktar veðkröfur nema samtals 1.930.233 krónur. Aðrar kröfur hafa stöðu almennra krafna.
Frestur til að skila inn kröfulýsingum rann út 22. október 2009. Engar forgangskröfur voru samþykktar. Kröfufjárhæðir taka breytingum til hækkunar eða lækkunar við endanlega afstöðu slitastjórnar með tilliti til mótmæla sem borist hafa. Engar bindandi ákvarðanir voru teknar á fundinum.
Eignir Frjálsa fjárfestingarbankans samanstanda öðru fremur af lánasöfnum til einstaklinga og fyrirtækja sem tryggð eru með veðum í fasteignum. Aðrar eignir eru fasteignir sem leigðar eru út og auk þess nokkrar lóðir og fasteignir á byggingarstigi.
Starfsemi Frjálsa fjárfestingarbankans felst aðallega í þjónustu við viðskiptavini, þótt ekki séu veitt ný lán, ásamt þjónustu við lánasöfn, innheimtustarfsemi, umsýslu leigufélaga og utanumhald ýmissa byggingarverkefna. Fram kom á kröfuhafafundinum að Frjálsi fjárfestingarbankinn mun taka þátt í úrræðum ríkisstjórnarinnar að því er varðar greiðslujöfnun og greiðsluaðlögun. Jafnframt mun bankinn bjóða skuldurum tímabundin viðbótarúrræði sem m.a. eru miðuð við greiðslugetu.
Frjálsi fjárfestingarbankinn komst í eigu SPRON í árslok 2002. Við fall SPRON fyrr á þessu ári lokaðist fyrir stuðning móðurfélagsins við fjármögnun bankans og þegar fyrirséð var að greiðsluörðugleikar bankans liðu ekki hjá á skömmum tíma var óskað eftir slitum á honum.
