Guðmundur Rúnar Guðmundsson

Jón Kr. Sólnes, stjórnarformaður, hefur tilkynnt stjórn Byrs, að hann muni tímabundið láta af stjórnarstörfum fyrir sparisjóðinn. Segir hann ástæðuna þá að hann hafi fengið stöðu grunaðs manns í tengslum við rannsókn á málefnum Exeter Holdings.

Fram kemur í tilkynningu til Kauphallar Íslands, að Guðmundur Geir Gunnarsson, sem verið hefur varaformaður stjórnar, taki við stjórnarformennsku. Samhliða þessu tekur Þorsteinn Ólafur Þorsteinsson sæti í stjórn Byrs.

Í tilkynningu frá Jóni segir, að við rannsókn á málefnum Exeter Holdings hafi hann, sem stjórnarmaður í Byr, gefið skýrslu hjá sérstökum saksóknara. 

„Þrátt fyrir að ég telji mig hafa hreinan skjöld í þessu máli, hef ég, eins og aðrir sem tóku þátt í afgreiðslu málsins, fengið réttarstöðu grunaðs. Af þeim sökum hef ég óskað eftir að láta af stjórnarstörfum á meðan á rannsókn málsins stendur og kalla inn varamann í minn stað.
 
Tildrög þeirrar stöðu sem nú er komin upp eru þau að þann 19. desember 2008 var ég kallaður inn á stjórnarfund í Byr sparisjóði sem varamaður.  Á fundinum voru meðal annars til umfjöllunar málefni Exeter Holdings (Tæknisetur Arkea) þar sem samþykkt var að framlengja yfirdráttarláni félagsins, sem sagt var í eigu MP fjárfestingarbanka og lánamörk hækkuð til þess að mæta vaxtagreiðslum. Í umræðum kom skýrt fram að ekki væri ætlunin að nýta þennan reikning í bráð en atburðarás næstu vikna leiddi í ljós að við það var ekki staðið.
 
Að mínu áliti er algjörlega nauðsynlegt að fullkomið traust ríki í garð allra þeirra sem koma að endurreisn Byrs sparisjóðs. Þess vegna vil ég víkja til hliðar á meðan ég hef umrædda réttarstöðu.  Ég vil nota tækifærið og þakka samstarfsfólki fyrir þann áfanga sem náðst hefur í endurreisn sparisjóðsins. Sjálfur mun ég, hér eftir sem hingað til, leggja mitt af mörkum til þess að ljúka megi þeirri vinnu," segir í yfirlýsingu Jóns Kr. Sólness.