Samkeppniseftirlitið fellst ekki á kvörtun Medine-Lux S.à.r.l. vegna viðbragða Teymis vegna tilboðs Medine í 51% hlut Teymis í fyrirtækinu IP-fjarskiptum (Tali). Var tilboði Medine ekki svarað innan tilskilins frests en Landsbanki Íslands (NBI) hafði þá tekið yfir hlut Teymis í Tali. Þegar svar barst sagði stjórnarformaður Teymis að hluturinn væri ekki til sölu og taldi Medine það stangast á við ákvörðun Samkeppniseftirlitsins um að selja ætti hlutinn.

Í upphafi árs 2009 fór Samkeppniseftirlitið í húsleit á starfsstöðvar Teymis, Vodafone og Tals vegna gruns um brot á samkeppnislögum. Var í kjölfarið gerð sátt við Teymi um að félagið og Vodafone hefðu brotið gegn ákvæðum samkeppnislaga. Var Teymi gert að greiða 70 m.kr. í stjórnvaldssekt og hlíta fyrirmælum í rekstri sínum. Þá skuldbatt Teymi sig til að selja hlut sinn í Tali.

Samkeppniseftirlitið álítur að Teymi hafi ekki haft heimild til þess að synja tilboði Medine á þeim grundvelli einum að eignarhlutur Teymis væri ekki til sölu á þeim tímapunkti. Ljóst er skv. ákvörðun Samkeppniseftirlitsins að hlutur Teymis í Tali var til sölu þegar tilboð barst, sbr. þá meginreglu ákvörðunar Samkeppniseftirlitsins að sölutilraunir skuli hefjast sem fyrst. Aftur á móti verði að virða svigrúm Teymis til þessa að afla frekari fjárhagslegra upplýsinga og koma eðlilegum aðgerðum í framkvæmd til að bæta rekstur Tals.

Að mati Samkeppniseftirlitsins hafa ekki verið færð fram sjónarmið af hálfu Medine sem hnekki því að Teymi hafi verið heimilt að láta sölutilraunir bíða þar til fullnægjandi upplýsingar liggi fyrir. Þá verði ekki véfengd staðhæfing Teymis um að félagið hafi ekki upplýsingar um verðmat NBI á hlutum í Tali.

Ákvörðun Samkeppniseftirlitsins í heild