mbl.is

Opinberar spár um þróun íbúðaverðs hafa gert ráð fyrir að það komi til með að lækka um helming að raunvirði frá því að það náði hámarki í ársbyrjun 2008. Í nóvember hafði íbúðaverð lækkað um 35,4% að raunvirði frá þeim tíma og samkvæmt þeim spám ætti mesta lækkunin að vera komin fram, þó líklega sé botninum ekki náð í þeim efnum, að því er fram kemur í Morgunkorni Greiningar Íslandsbanka.

Í morgun birti Fasteignaskrá Íslands upplýsingar um fasteignaviðskipti á árinu sem er að líða. Þar kom fram að fasteignasala hefur ekki verið jafn lítil í tæpa þrjá áratugi.

Einn liður í stórkaupavísitölu Gallup sem birt var í gær er vísitala fyrir fyrirhuguð húsnæðiskaup sem gefur vísbendingu um eftirspurn á íbúðamarkaði. Hækkaði vísitalan nú í desember lítillega, eða um 1,5 stig, frá síðustu mælingu sem fram fór í september og mælist nú 6,1 stig.

„Bendir þetta til þess að fleiri geti hugsað sér nú en þá að ráðast í húsnæðiskaup á næstu 6 mánuðum. Vísitalan er þó enn í grennd við sögulegt lágmark og hafa skal í huga að mikill meirihluti aðspurða telur það enn mjög ólíklegt að þeir muni kaupa hús eða íbúð á næstu 6 mánuðum. Þannig töldu 93% aðspurðra það mjög eða frekar ólíklegt en einungis um 4% aðspurðra frekar eða mjög líklegt.

Þessi niðurstaða kemur ekki á óvart í ljósi þess ástands sem nú ríkir og ekki er að vænta að hagur heimilanna vænkist á næstunni. Þannig er spáð að atvinnuleysi, sem nú er þegar mikið, fari vaxandi, kaupmáttur launa rýrni enn frekar, skattar fari hækkandi og gengi krónu verði áfram lágt. Ljóst er að þessir þættir eru síst til þess fallnir að auka eftirspurn á íbúðamarkaði enda vilja eflaust fáir festa fé sitt í íbúðarhúsnæði við slíkar aðstæður," að því er segir í Morgunkorni.

Það sem af árinu, þ.e. frá desember í fyrra til nóvember síðastliðins, hefur verð á íbúðarhúsnæði á höfuðborgarsvæðinu lækkað um 10% að nafnvirði m.v. vísitölu íbúðaverðs á höfuðborgarsvæðinu. Enn meiri lækkun hefur verið að raunvirði, eða sem nemur um 18,6%. Þrátt fyrir að vísitala íbúðaverðs sé ekki komin fyrir desembermánuð bendir þetta til að lækkunin að nafnvirði sé nokkuð minni en við höfðum reiknað með í spá okkar um verðþróun á íbúðamarkaði sem birt var í desember í fyrra. Þannig höfðum við gert ráð fyrir að íbúðaverð kæmi til með að lækka um 15% að nafnvirði og um 18% að raunvirði á árinu.